Atilla Kardesh ka mbyllur rrugëtimin e tij në shtëpinë e Big Brother Vip Kosova. I njohur edhe si ish-bashkëshorti i Drenusha Latifit, një nga banoret e BBVK-së, Atilla është i akuzuar për dhunë në familje nga Drenusha, ndërsa pranimi i tij në këtë spektakël ka shkaktuar reagime të ashpra.
Edhe Ministria e Drejtësisë e Kosovës ka ndërhyrë për këtë rast, duke kërkuar largimin e menjëhershëm të Atilla Kardesh nga spektakli përmes një njoftimi zyrtar, si dhe marrjen e masave ndaj produksionit.
Para se të largohej nga shtëpia, ai mbajti një fjalim të shkurtër përpara banorëve, ku deklaroi se arsyeja e hyrjes së tij në spektakël ishte për t’i kujtuar Drenushës rëndësinë e mirëqenies së dy fëmijëve të tyre të përbashkët.
“Ka pas shumë hipoteza përse jam unë këtu, a lojë a me i qetësu gjanat, a me i shpjegu gjanat, a me ju shti me menu, a me kërku falje. Kështu që sic e dini unë e Drenusha i kena dy fëmijë jashtë. Kemi qenë 10 vjet bashkë, ka pas momente të mira, ka pas momente të këqija, si gjithë krejt. Nuk kemi ditë me i kry këto punë. Dy fëmijë kanë hy në lojë, psiqika e fëmijëve, mirëqenia e tyre edhe që nga unë e që nga ajo,” tha Atilla para se të dilte nga shtëpia.
