Historia e gazetares së njohur të “BBC” Rachael Bland, u bë e njohur në të gjitha mediat për shkak të letrave që shkruante vazhdimisht. Edhe pse e dinte se nuk i kishte mbetur edhe shumë kohë, Rachael nuk ngurronte të shijonte çdo moment dhe të ishte tepër aktive. Ajo punoi deri ditën e fundit dhe asnjëherë nuk harronte të nxirrte për shëtitje djalin e saj 2-vjeçar.
Ditën e djeshme ajo bëri një njoftim në “Instagram” ku tregonte se sëmundja kishte avancuar shumë dhe se e ndjente që nuk do rezistonte edhe për shumë kohë. Pa kaluar 24 orë nga kjo, bashkëshorti i gazetares ka dhënë lajmin e hidhur, se Rachael ndërroi jetë. Nëpërmjet një postimi në ‘Instagram’ ai ka shkruar për momentet e këqija që po kalon së bashku me djalin.
“Rachaeli jonë e zonja, e bukur, e mrekullueshme dhe kurajoze vdiq paqësisht këtë mëngjes e rrethuar nga familja e afërt. Jemi të gjithë zemërthyer për zbrazëtinë që ajo la në familjen tonë perfekte e që kurrë nuk ka për t`u mbushur. Për të gjithë ata që u interesuan për historinë e saj këto dy vitet e fundit që e ndoqët dhe i dërguat mesazhe dhe mbështetje, ju falënderojmë nga thellësia e zemrës. Nuk keni për ta kuptuar kurrë se sa të rëndësishme kanë qenë ato mesazhe për atë dhe për ne. Do na mungojë shumë, por njëkohësisht jemi edhe krenarë për gjithçka që ajo arriti në këto 40 vite dhe për impaktin që ajo pati në jetët e shumë njerëzve. Faleminderit! Steve dhe Freddie”, shkruan bashkëshorti i saj./revistawho.com
