Prej nëntë vitesh ai shoqëron mëngjeset tuaja nëpërmjet valëve të radio “Club Fm”. Gazetari dhe spikeri i njohur, Blendi Salaj drejton emisionin “Klubi i Mëngjesit” i cili është kthyer në një nga programet më të këndshme radiofonike.
Por Salaj provoi të ishte gjithashtu edhe si ideator i një prej programeve më të ndjekura të Top Channel, “Shiko kush luan”, ku erdhi si bashkautor me moderatoreni, Luana Vjollca. Në një intervistë për “Lart e Poshtë”, Blendi Salajt i kemi kërkuar të na thotë disa nga të metat e Luanës, të cilat ai i ka miksuar edhe me gjërat e saj pozitive.
“Çfarë do t’i riparoja unë Luanës është orari, ndërsa gjërat e mira janë energjia dhe ambicia e jashtëzakonshme. Do më të mirën për programin, për veten për atë që ajo bën dhe kjo e ndihmon pasi synon lart dhe jo në nivel mesatar apo të ulët”, – është shprehur Salaj.
I pyetur nga gazetarja Suada Daci, nëse do të bashkëpunonte sërish me “Top Channel”, Blendi Salaj ka thënë se mbetet i hapur për ftesa të tjera. “Nuk kam një plan konkret tani, por pas një bashkëpunimi të mirë me ‘Top’-in është e natyrshme të mendosh për një bashkëpunim tjetër. Do të isha i lumtur të bashkëpunoja me ‘Top Channel’ apo çdo televizion tjetër që është në treg”, – ka përfunduar ai./revistawho.com
