Pavarësisht se u shfaq me një buzëqeshje të ndritshme në tapetin e kuq të Met Gala 2025, Bebe Rexha kishte një histori tjetër për të treguar pas kamerave. Këngëtarja e njohur, e nominuar për çmimin Grammy, ndau së fundmi një rrëfim emocional në X (ish-Twitter), të cilin më vonë e fshiu, duke zbuluar një betejë të padukshme që po përjeton.
“Jam shumë e lodhur nga komentet për peshën time. Kam PCOS dhe përballem me infertilitet. Mbeta shtatzënë, dhe nuk funksionoi. E kam mbajtur këtë dhimbje në heshtje,” shkroi ajo. “Nuk i detyrohem askujt të vërtetën time, por ndoshta do t’ju bëjë të mendoni dy herë përpara se të komentoni trupin e dikujt.”
Bebe u pa për herë të parë në Met Gala më 5 maj, e veshur nga stilisti Christian Siriano, dhe shkëlqeu me një look të guximshëm. Megjithatë, në sfondin e kësaj paraqitjeje, artistja po përballej me kritika të shumta në rrjet për pamjen e saj. Në të njëjtin postim në X, ajo iu përgjigj edhe deklaratave të Azealia Banks, përpara se të mbyllte mesazhin e saj me një shënim të qetë:
“Tani do të vazhdoj ditën time. Ju dua, kalofshi bukur.”
Këngëtarja ka folur më parë për sfidat që sjell sindroma e vezoreve policistike (PCOS), një çrregullim hormonal që ndikon te shumë gra. Në një rrëfim në TikTok në maj 2024, ajo kishte ndarë një përvojë të dhimbshme që e çoi në spital:
“Mjeku mendoi se ishte apandesit, por në fakt ishte një kist që kishte shpërthyer. Më vinte për të vjellë nga dhimbja. E vetmja gjë që më ndihmoi ishte një jastëk ngrohës,” kujtoi ajo, duke dhënë edhe një këshillë praktike për të gjitha vajzat që mund të përballen me të njëjtën gjendje.
Edhe pse ndodhet shpesh në qendër të vëmendjes dhe përballon presionin publik, Bebe përpiqet të ruajë pozitivitetin dhe vetëpranimin. Në qershor 2023, ajo kishte shkruar në Instagram:
“E di që kam shtuar peshë. Njerëzit kalojnë nëpër ndryshime.”
“Nuk do të gënjej, më mërzit kur lexoj disa komente, por kjo vjen me këtë profesion. Po mësoj të mos e gjykoj veten dhe të pranoj veten, ndërsa përpiqem të bëj zgjedhje më të shëndetshme. Ajo që kam mësuar është se nuk të përcaktojnë numrat, por zemra jote.”
