Beteja mes Thomas Graziosos dhe Fatlum Muqollit ngjalli diskutime tek ndjekësit e programit. Që nga nata e spektaklit, pati debate mes komentuesëve për zgjedhjen e trajneres së edicionit të gjashtë të ‘The Voice of Albania’. Pas shumë diskutimesh, Besa mesa duket ka vendosur të thotë të sajën për të gjithë ndjekësit të cilët kanë keqkuptuar vendimin e saj për të vazhduar garën me Fatlumin.
Nga faqja e saj zyrtare në YouTube, ajo komenton pikërisht në videon e betejës së Thomas dhe Fatlum duke shkruar:
“Faleminderit për komentet të dashur miq. Për ata që janë keqkuptuar, nuk zgjodha Fatlumin, sepse Thomas ishte profesionist; kjo do qe absurde! Por sepse këndimi i Thomas, për artist profesionist, ishte shumë problematik. Frazim i dobët, probleme të mëdha intonative, emocion i munguar, mungesë konsistence dhe dalje nga ritmi ne 1.30. Gjithashtu egërsi e panevojshme në interpretim (bërtitje), probleme në diksion.
Fatlumi ndërkohë si jo-profesionist, frazon shumë më mirë, më i saktë intonativisht, emocionues dhe vokal kontemporan dhe i freskët, plot shpirt.
I kurseva këto detaje në show, për të mos e ofenduar një artist profesionist. Love”
