Vendimi i jurisë në natën finale të festivalit të ‘RTSH-së’ shkaktoi mjaft zhurmë në rrjet. Ndjekësit e këngëtarëve nuk ranë dakort me vlerësimin e pikëve, duke e quajtur këtë të fundit të padrejtë.
Pas gjithë postimeve në rrjet, Elvana Gjata ka zgjedhur të reagojë mbrëmjen e sotme me anë të një postimi plot dashuri në llogarinë e saj në rrjetet sociale.
“Refuzoj të flas në këto raste, por më duhet ta bëj. Arilena, nuk është faji yt dhe të uroj me gjithë zemër vetëm sukses. Dua të falenderoj të gjithë shqiptarët kudo që ndodhen, por edhe fansat e rinj europian për dashurinë, mbështetjen që më keni dhënë që ditën që ‘Me tana’ doli. I kam parë të gjitha sondazhet e ju kam parë të këndoni e kërceni me syte e mi çdo ditë, e ju pashë dhe në sallë me duart lart. Ju kam dëgjuar kur thërrisni emrin tim plot zjarr, në festivale në Diasporë dhe në Prishtinë, e dëgjova dhe dje në Tiranë si kurrë më parë në jetën time. Zemra plot. Kam punuar fort e do punoj deri sa të kem frymë. Puna s’më ka hedhur poshtë kurrë, as balta e helmi, me apo pa porosi. Faleminderit jurisë europiane për vlerësimin maksimal. U gëzova shumë. Dashni më fal, as 2 pikëshi i Mikaelës s’mundet me ma ndal. Pranojeni jetën me tana, gëzojeni jetën me tana. Mezi pres projektet e reja”, ka shkruar Elvana krah postimit të saj më të fundit në ‘Instagram’ ku ka pasur menjëherë mbështetjen në komente të gjithë ndjekësve besnikë ndër vite, por dhe personazheve të njohur të ‘showbiz-it’ shqiptar.
Kujtojmë se Gjata u rendit në vendin e dytë, në një garë midis 12 këngëtarësh në natën finale të festivalit të ‘RTSH-së’. Performanca e kuruar deri në detaje e ‘Me tana’ ngriti në këmbë gjithë publikun prezent në sallën e pallatit të Kongreseve./revistawho.com
https://www.instagram.com/p/B6brciXJLPk/?igshid=1a664buywxy98
