Ditën e djeshme, Taylor Swift publikoi këngën e saj më të re ‘You Need To Calm Down’. Me këngën sigurisht erdhi dhe videoklipi, i cili dukej me shumë ngjyra dhe i përshtatej muajit të ‘LGBT’. Ajo çfarë çuditi më shumë fansat ishte prania e Katy Perry-t në fund të videoklipit, e cila shfaqej e veshur si një hamburger gjigand. Taylor ka pranuar për “Radio 1 Breakfast Show” se në fakt, ajo dhe Katy janë pajtuar që para shumë kohësh, por të dyja kishin vendosur ta mbanin sa më private. Këngëtarja tha se pasi kishte krijuar konceptin e videos, kishte menduar të pyeste Katy-n nëse do të bëhej pjesë e saj, ndërsa kjo e fundit ishte përgjigjur duke thënë se do të dëshironte shumë të ishte një simbol faljeje dhe pendese. “Nuk e kisha idenë e hamburgerit derisa ajo vetë e veshi në festën e ‘Met Gala’. Mendova se ishte një ide e mrekullueshme dhe i thashë se do të realizonim një skenë të tillë në videoklip. ‘A mund të veshim kostum si hamburger dhe një si patate gjigande për të treguar se jemi të bëra për njëra-tjetrën?’, i thashë Katy-t. Asaj iu duk një ide e bukur, kështu që e bëmë”, ka zbuluar Taylor. Kënga e re e Swift gjithashtu është komentuar shumë për përmbajtjen e saj politike./revistawho.com
