Rihanna, këngëtarja dhe sipërmarrësja që ndërtoi një perandori të tërë në muzikë dhe modë, nuk është më miliarderja që ishte. Revista Forbes ka publikuar përditësimin më të fundit të listës së saj për “Gratë më të pasura që e kanë ndërtuar vetë pasurinë në SHBA”, dhe për herë të parë pas disa vitesh, Rihanna ka zbritur në vlerën neto prej 1 miliard dollarësh – një rënie e ndjeshme prej 500 milionë dollarësh nga viti i kaluar.
Rënia financiare vjen pavarësisht faktit që markat e saj – veçanërisht Fenty Beauty – vazhdojnë të kenë sukses në treg. Megjithatë, siç thekson Forbes, ka pasur “sfida brenda disa prej bizneseve të saj kyçe që kanë ndikuar negativisht në të ardhurat”.
Një nga momentet vendimtare ka qenë largimi i CEO-së së Savage X Fenty në gusht të vitit 2024. Drejtuesi i markës u largua për të marrë drejtimin e Victoria’s Secret – një ndryshim që, sipas mediave ekonomike, e ka ndikuar ndjeshëm ecurinë e linjës së të brendshmeve të Rihanna-s.
Edhe pse Fenty Beauty vazhdon të shesë mirë, rritja e saj ka qenë më e ngadaltë sesa pritej. Zgjerimi i pranisë së saj në Kinë, në bashkëpunim me LVMH, nuk ka rezultuar aq fitimprurës sa shpresohej. Kjo ka kontribuar në rënien e përkohshme të vlerës neto të Rihanna-s.
Pavarësisht goditjes financiare, Rihanna qëndron në vendin e 35-të në listën prestigjioze të Forbes, përkrah figurave si Oprah Winfrey, Beyoncé, Kim Kardashian, Serena Williams dhe Taylor Swift.
Ajo mbetet po aq aktive në industrinë e bukurisë dhe modës. Në prill, Savage X Fenty prezantoi një koleksion të ri nusërie, ndërsa Fenty Beauty riktheu në treg produktin ikonik Body Lava, pikërisht për sezonin e verës.
