Nga Dr. Shk.M Blerta Gjoni MD – Dermatologe, Poliklinika Qendrore
Flokët, flokët, flokët! Thuhet që gjysma e bukurisë janë ato. Sa shumë shqetësohemi kur nuk na rrinë bukur apo kur fillojmë të kemi probleme me to, sikurse kur fillojnë të bien më shumë se normalisht, kur fillojnë dhe hollohen apo kur humbasin shkëlqimin dhe vitalitetin e tyre. Ka me dhjetëra e qindra produkte që reklamohen për përkujdesjen ndaj tyre; a janë ato vallë vërtet të efektshme? Disa nga patologjitë më të shpeshta të flokëve janë:
Rënia e flokëve në formë difuze (telogen effluvium)
Kur flokët fillojnë të na bien më shumë se normalisht (më shumë se 100 fije në ditë), të na rrallohen e të humbasin vitalitetin e tyre, atëherë shkaqet më të shpeshta të kësaj rënieje janë:
• Deficencat ushqimore që vijnë si rezultat i një mënyre ushqyerjeje jo të shëndetshme, mungesa e fibrave, vitaminave, mineraleve, që përgjithësisht gjenden në perime dhe fruta, mbajtja e dietave të forta për periudha të gjata kohe;
• Shkaqet endokrinologjike si hypo ose hyper tiroidizmi dhe postpartum (mbas lindjes së një fëmije. Kjo sepse, si rezultat i proceseve të shumta mitotike që ndodhin gjatë shtatzënisë, flokët gjatë kësaj periudhe nuk bien, por pas lindjes, të gjithë ata flokë që normalisht duhej të kishin rënë gjatë periudhës së shtatzënisë, fillojnë e bien njëherësh, rreth 3-4 muaj pas lindjes);
• Stresi i madh psikik dhe ai fizik;
• Anemitë, sidomos ato ferriprive (që vijnë si rezultat i marrjes të paktë të hekurit apo humbjes së tij nga organizmi, siç janë hemorragjitë e ndryshme);
• Infeksionet e përsëritura streptokoksike të fytit, hundës, veshëve etj.
E mira është që, përpara se të shkojmë nëpër qendra estetike dhe t’i trajtojmë këto rënie, të kontaktojmë me mjekun dermatolog për të gjetur shkaqet (që siç u përmendën më lart janë të shumta), sepse pa mjekuar shkaqet, ne nuk ndalojmë dot rënien e tyre, pavarësisht trajtimeve të jashtme që mund të bëhen për flokët, si maska apo produkte të tjera kozmetike. Trajtimi i flokëve bëhet duke kombinuar terapinë orale (që lufton shkakun) me aplikimin e produkteve kozmetike për flokët. Kujdes duhet treguar me aplikimin pa kriter të këtyre produkteve. Larjet e shpeshta, përdorimi i procedurave kozmetike si tharjet e shpeshta me tharëse, aplikimi i produkteve për t’i shtrirë apo për t’i bërë kaçurrela, ekspozimi për periudha të gjata në diell, e thajnë dhe e hollojnë flokun.
Alopecia areata
Është një rënie e flokëve e lokalizuar në formë vatrash. Ajo është një tjetër patologji ku floku bie në formën e vatrave, të rrumbullakëta apo ovale. Lëkura në këto vatra duket e shëndetshme, por pa flokë. Kjo formë e rënies së flokëve ka shkak përgjithësisht autoimun, që do të thotë se, në mënyrë të paparashikuar, vetë trupi ynë krijon antitrupa që shkatërrojnë rrënjën e flokut (folikulin e tij). Në 30% të rasteve shoqërohet me patologji të tjera autoimune, siç janë: thiroiditet autoimune (sëmundje e gjëndrës tiroide), vitiligo (zbardhje e lëkurës me vatra) dhe anemia pernicioze.
Trajtimi i kësaj patologjie konsiston në injektimin e solucioneve kortizonike në vatrën alopecike, me një interval prej 4 javësh, dhe vitaminoterapi.
Alopecia androgjenike
Shpesh themi: “Edhe pse s’ka flokë, është njeri fisnik”. Rënia e flokëve në pjesën ballore të kokës quhet alopeci androgjenike, e cila ndodh si rezultat i kombinimit të faktorëve gjenetikë me faktorë hormonalë – andogjenet, që janë hormone mashkullore dhe që veprojnë duke rritur apo shtuar qimet në pjesë të ndryshme të trupit, por fatkeqësisht bëjnë që të bien flokët në pjesën ballore të kokës (përgjithësisht te personat që e kanë të trashëguar). Alopecia androgjenike ndodh, si te meshkujt, ashtu edhe tek femrat. Tek femrat kërkohen ekzaminimet hormonale si testosteroni apo dehydroepiandrosteroni, sepse kjo patologji mund të shoqërohet edhe me shqetësime të tjera, si: cikël menstrual i çrregullt, infertilitet, akne, virilizëm. Trajtimi: aplikohet solucion minoxidil, lokalisht 2% dhe 5% në zonën e kokës ku ka rënie flokësh, ndërsa te meshkujt përdoret edhe finasterid 1 mg çdo ditë, – mjekime këto që duhen dhënë dhe ndjekur nga mjeku dermatolog.
Trichotillomania
Trichotillomania është një patologji që ka të bëjë me një ndjenjë kompulsive për të shkulur flokët dhe ka lidhje me çrregullime kompulsive psikike. Këta persona, duke e realizuar vetë shkuljen e flokëve, qetësohen nga kjo lloj ndjenje dhe në njëfarë mënyre shkarkojnë stresin që përjetojnë. Flokët në zonat ku shkulen janë të rrallë, por duken mjaft folikuj flokësh, gjë e cila të ndihmon ta diagnostikosh saktë këtë patologji. Zakonisht vihet re tek adoleshentët apo edhe te fëmijët, dhe rënia e flokëve në këtë rast nuk ka shkaqe organike, por mbrapa saj fshihet një çrregullim psikik, që mund të vijë si rezultat edhe i përjetimit keq të situatave të vështira. Mjekimi në këtë rast bëhet në bashkëpunim me mjekun psikiatër.
Discussion about this post