Internetin e kemi gjithmonë në xhep, falë telefonave tanë që janë bërë të pandashëm nga jeta e përditshme. Sipas një ankete të fundit për Teknologjinë e Informacionit dhe Komunikimit në familjet shqiptare, 99.9% e përdoruesve hyjnë në internet përmes telefonit. Pajisje të tjera si kompjuterët, laptopët dhe tabletat mbeten më pak të preferuara.
Çfarë blejnë shqiptarët online?
Një ndër aktivitetet më të përhapura online është blerja. Rreth 42.4% e popullsisë bën blerje në internet, ku dominojnë rrobat, këpucët dhe aksesorët – zgjedhja kryesore për 90.3% të blerësve. Por, nuk mungojnë as porositë për ushqim, një trend gjithnjë e më i përhapur.
E-banking dhe shërbimet shëndetësore po marrin hov
Në muajt e fundit, teknologjia ka bërë përparime të mëdha në fushën e e-banking. Përdorimi i internetit për shërbime bankare është rritur me 3.3%, ndërsa aksesi në të dhënat shëndetësore online ka shënuar një rritje prej 1.5%. Shqiptarët gjithashtu po lexojnë më shumë lajme online, me një rritje prej 1.3%.
Ushqimi, moda dhe shërbimet online
Këto duken se janë kryefjala e mënyrës se si shqiptarët e përdorin internetin. Me një ritëm të tillë rritjeje, interneti nuk është thjesht një mjet argëtimi, por një mjet jetik për çdo nevojë të përditshme.
Tregu online shqiptar vazhdon të rritet, duke na treguar qartë se e ardhmja është digjitale!
