Një grua e re 29 vjeçe, Dalina Azuni, martuar në fshatin Ndroq të Tiranës, ka arritur t’ia tërheqë fort vëmendjen të shoqit dje, pas debateve që kishin për shkak të indiferencës që ai shfaqte ndaj saj.
Dalina u arrestua nga Komisariati nr.6 i Tiranës, pasditen e djeshme, në orën 4:40 me dy akuza dhe i shoqi, I.Azuni, pas dyerve të komisariatit, tani po interesohet sesi ta shpëtojë me sa më pak dënim.
Policia e Tiranës njoftoi se dje pasdite kishte marrë një telefonatë nga fshati Pinet,Ndroq, ku njoftohej se një hajdut kishte lidhur gruan e re në familjen Azuni dhe u kishte vjedhur 65 mijë lekë.
Gruaja e lidhur ishte gjetur nga familjarët, pasi kishte kërkuar ndihmë nga dritarja duke i thirrur.
Policia në alarm ka nisur kontrollin në shtëpi dhe hetimin për autorët, por ajo ç’ka zbuloi ishte e çuditshme: Paratë ishin fshehur në një nga dhomat e shtëpisë nga vetë zonja gjoja e grabitur. Dalina ishte lidhur vetë dhe alarmi ishte vënë prej saj. Arsyeja? Policia e Tiranës tha se “nga intervistimi paraprak , shtetësja Dalina Azuni, pranon se i ka bërë këto veprime vetëm për të tërhequr vëmendjen e të shoqit pasi kishte vënë re që kohët e fundit nuk kishin komunikim dhe kishte mosmarrëveshje mes tyre.”
Njoftimi i policisë :
Më datë 22.10.2016, rreth orës 4:40, në numrin e emergjencave 112, ka ardhur nje njoftim se në fshatin Pinet, Ndroq, në banesën e shtetasit I. Azuni dyshohet se ka hyrë një person për të vjedhur, i cili duke përfituar se i zoti i banesës ishte larguar ka lidhur të shoqen shtetasen Dalina Azuni dhe më pas ka marrë në banesë shumën prej 65.000 lekësh.
Menjëherë në adresën e dhënë janë dërguar shërbimet e Komisariatit të Policisë Nr 6, të cilët kanë filluar kontrollin e territorit dhe mbledhjen e informacioneve për autorët e mundshëm të kësaj ngjarje.
Nga informacionet e marra është mësuar se bashkëshortët Azuni, prej disa kohësh nuk kishin një mardhënie të mirë me njëri tjetrin. Duke qënë përpara këtyre fakteve Specialistët e Komisariatit të Policisë Nr 6, kanë filluar hetimin në drejtim të një kallëzimi të rremë dhe nga ku kanë arritur të faktojnë se:
Pas largimit të bashkëshortit të saj, shtetësja Dalina Azuni, dyshohet t’i ketë fshehur në një nga dhomat e tjera shumën e lekëve (të cilat u gjetën nga kontrolli i ushtruar nga Specialistet e Policisë pas dyshimeve) dhe më pas ka hapur dritaren e banesës dhe dyshohet se ka lajmëruar familjarët që dikush kishte hyrë në banesë.
Kur kanë shkuar familjarët e kanë konstatuar të lidhur në banesë këtë shtetase.
Nga intervistimi paraprak , shtetësja Dalina Azuni, pranon se i ka bërë këto veprime vetëm për të tërhequr vëmendjen e të shoqit pasi kishte vënë re që kohët e fundit nuk kishin komunikim dhe kishte mosmarreveshje mes tyre.
Duke qënë përpara këtyre fakteve Specialistët e Komisariatit të Policisë nr 6, kanë bërë arrestimin e shtetases: Dalina Azuni, 29 vjeçe, banuese në Tiranë.
Materialet proceduriale i’u kaluan Prokurorisë pranë Gjykatës së Shkallës së parë Tianë, për veprat penale “Kallëzim i rremë” dhe “Njoftim i rremë në organet e rendit publik”, parashikuar nga Nenet 305 dhe 272 të Kodit Penal.
