Elia Zaharia, partnerja e Princ Leka II, ka zbuluar një nga misteret e dasmës së tyre mbretërore të 8 tetorit. Ajo ka treguar ftesat e dasmës, zarfi i të cilave mban simbolin e Oborrit Mbretëror të Shqipërisë, të cilat shumë shpejt do të shpërndahen edhe jashtë Shqipërisë. Dasma e tyre, do të jetë një ngjarje që do të kapërcejë kufijtë e vendit tonë për shkak të mjaft të pranishmëve nga familjet fisnike evropiane, me të cilat Princ Leka ka edhe marrëdhënie gjaku. Pak ditë më parë çifti ka qenë në një vizitë në Stokholm ku kanë realizuar edhe foto për një revistë mbi familjet mbretërore evropiane. Leka II, 34 vjeç dhe Elia, 33, bashkëjetojnë prej vitesh dhe tashmë kanë vendosur të hedhin hapin vendimtar që pritej prej kohësh, por nuk është e lehtë të organizosh një event si ai që duhet të jetë dasma e tyre. “Nuk është thjesht një dasmë, është një ngjarje me të cilën do u tregojmë Shqipërinë shumë të ftuarëve”, ka thënë Elia para disa kohës në revistën Class duke folur për arsyet pse ende nuk e kishin vendosur datën e martesës. Në ngjarje të tilla, ku ftohen edhe persona me axhendë të përcaktuar, gjithçka duhet vendosur kohë më parë, siç tregon edhe përgatitja e ftesave tre muaj para./ Revistaclass.al
