Në fillim të këtij viti u mbyll me sukses edicioni i parë i një ndër emisioneve më të diskutuar “Hell’s Kitchen”. Nën drejtimin e shefit të njohur, Renato Mekolli, në kuzhinën e “Hell’s Kitchen” të gjithë provuan çfarë do të thotë presion, stres dhe sfidë për realizimin e një pjate të bukur. Ky emision shkaktoi reagime të shumta nga ana e publikut dhe shumë shpejt pritet të nisë edicioni i dytë i tij. Shef Renato ka treguar se këtë herë “Hell’s Kitchen” do të vijë në formatin e një spektakli të vërtetë. Ai ka zbuluar një pjesë nga skenografia që po ndërtohet në studiot e reja të “Top Channel” dhe ka treguar se puna që po bëhet është me të vërtetë shumë e madhe.
“Kjo që po ndodh në studion më gjigande ‘Nova’ të ‘Top Channel’, që për herë të parë hapet për ‘Hell’s Kitchen’, nuk ka ndodhur kurrë më parë në një ‘reality show’ gatimi. Çdo gjë nga e para: një kuzhinë moderne dhe gjigande, shtëpia më luksoze që ka pasur një ‘reality show’ gatimi deri më tani, pishina dhe kopshti ku do të relaksohen konkurrentët nga nervat e kuzhinës, stresi mes tyre si edhe shumë surpriza të tjera na presin këtë sezon. Bëhuni gati, unë nuk do të ndryshoj, ‘Hell’s Kitchen’ po”, ka shkruar Renato.
https://www.instagram.com/p/Bwr6CkvHRww/
Ndryshe nga çfarë u tha se shumë shpejt do të niste një spektakël gatimi për fëmijë, shefi i njohur ka dhënë lajmin se nuk do të startojë këtë sezon për shkak të angazhimeve me “Hell’s Kitchen”. Edicioni i dytë i spektaklit të gatimit do të nisë në tetor dhe siç duket gara dhe emocioni do të jetë akoma dhe më i fortë. /revistawho.com
