Përplasje politike midis dy shteteve për “Festivalin Europian”: Na hoqët këngëtaren, s’e transmetojmë!

Sivjet Eurovizioni është kthyer në mollë sherri midis Rusisë dhe Ukrainës. Siç dihet Festivali i këtij viti do të mbahet muajin e ardhshëm në Kiev të Ukrainës. Kjo e fundit ndërkohë ka refuzuar pjesëmarrjen e Rusisë në listën e këngëve konkurrente. Rusia është kundërpërgjigjur duke vendosur të mos e transmetojë Eurosongun. Juli Samoilova 28 vjeçe nuk mund të performojë në këtë kompeticion sipas vendimit të autoriteteve në Kiev. Arsyeja është sepse dy vjet më parë ajo ka vizituar Krimenë, regjionin ukrainas që Rusia e aneksoi në vitin 2014 në mënyrë të jashtëligjshme, sipas komunitetit ndërkombëtar. Nga ana tjetër vendimi i Moskës për të mos e transmetuar Eurovizionin e përjashton tërësisht Rusinë nga ky festival. Organizatorët kërkuan nga rusët që të dërgonin një tjetër këngëtare përfaqësuese ose që vetë Samoilova të këndojë në lidhje direkte nga Rusia, pra pa shkelur në Ukrainë. Të dyja propozimet u refuzuan./ revistawho.com