Personazhet VIP që kanë zgjedhur një mik me 4 putra

Në gjurmët e dashurisë së profesor Uenos, për një ndjenjë që nuk shteron me kohën

Nga Jonida Hitoveizi

Hachiko e priste të zotin, një profesor të nderuar, çdo ditë në stacionin e trenit. Ai e shoqëronte në mëngjes dhe e priste pasdite, që të kthehej me të në shtëpi. Në 25 maj të vitit 1925, kur Hachiko ishte 18 muajsh, ai priti për 4 orë në stacion që i zoti t’i vinte, por profesor Ueno kishte pësuar një hemorragji cerebrale në punë. Hachiko vazhdoi të priste kthimin e të zotit. Ai erdhi vërdallë në stacion, çdo ditë për nëntë vitet e ardhshme. Hachiko lejoi një kushëri të profesorit Ueno të kujdesej për të, por kurrë nuk u largua nga stacioni. Pritja e tij vigjilente në stacion bëri që komuniteti në vitin 1934, pak pas vdekjes së Hachikos, të ndërtonte një statujë bronzi, në stacionin e trenit ku ai priti për 10 vjet të zotin. Sot statuja ekziston ende, si një shenjë e Hachikos, i cili na tregon një besnikëri që vështirë ta gjesh mes njerëzve të sotëm. Kjo është historia e këtij qeni, me ndjenja më të forta se ato që ndoshta përjetojnë njerëzit e kohëve moderne, në vrapin për të mos humbur kohën, e duke humbur çastet. Hachi pati kohë boll dhe e shpenzoi atë për të na mësuar që dashuria më e madhe është përtej njeriut. Kaq universale! Do të ishte mëkat ta përvetësonim vetëm ne, njerëzit, që shpesh hiqemi si superiorë në fushën e ndjenjave. Me siguri ky është një mashtrim për të mbrojtur veten. Gjyshja ime dikur thoshte se ‘kafshët duan më shumë se ne, por nuk kanë gojë që të na e tregojnë’. Ndaj ne e harrojmë dashurinë e tyre. Sepse ne kemi fjalët, ndërsa ata sytë dhe besnikërinë ndaj nesh.

Personazhet që kemi zgjedhur për të ilustruar dashurinë për kafshët nuk janë profesorë, por njerëz të medias. Nuk është çudi t’i shohësh shpesh nëpër studio televizive me kafshët që ata kanë preferuar t’i kenë miq të përjetshëm. Deklaratat e tyre se përse duhen kaq shumë kafshët dhe përse kanë zgjedhur të kujdesen për to, nuk janë më të reja. Gjithashtu personazhet tanë shpesh kanë dalë në kauza për mbrojtjen dhe mosdhunimin e kafshëve, sidomos të qenve të rrugës.

[metaslider id=1826]