Adrien Brody triumfoi në Oscar duke fituar çmimin për aktorin më të mirë në filmin “The Brutalist”, por një moment i pazakontë gjatë ceremonisë tërhoqi vëmendjen e publikut. Teksa ngjitej në skenë për të marrë trofeun, aktori pështyn çamçakëzin dhe ia hedh të dashurës së tij, Georgina Chapman.
Ky gjest ndezi debat në rrjetet sociale. Disa e quajtën të pahijshëm dhe mungesë respekti, ndërsa të tjerë nuk e panë si problem. Reagimet në internet varionin nga kritika për sjelljen e tij deri te mbrojtja e aktorit, me argumentin se ai mund të ketë vepruar në mënyrë impulsive nga emocionet e fitores.
Brody është në një lidhje me Georgina Chapman që nga viti 2020 dhe shpesh e ka cilësuar atë si një partnere të jashtëzakonshme. Ndërkohë, një tjetër moment i bujshëm gjatë ceremonisë ishte ribashkimi i tij me Halle Berry. Dyshja rikrijoi puthjen ikonike të vitit 2003, kur Brody fitoi Oscar-in për “The Pianist”, duke sjellë nostalgji te publiku.
