Prej ditësh, një përplasje mes aktorit Herion Mustafaraj dhe familjes Simaku ka bërë bujë në media, me pretendime që shkojnë deri te cënimi i privatësisë dhe shqetësimi emocional.
Gjithçka nisi kur mbesa e këngëtares së njohur Parashqevi Simaku, Ina Simaku, deklaroi se familja e saj po planifikon veprime ligjore ndaj aktorit, duke e akuzuar për hyrje pa leje në dhomën e këngëtares në hotelin ku ai punon. Sipas saj, Mustafaraj ka përdorur kartën e punës për të hyrë në dhomë, duke shkelur rëndë privatësinë e saj. Për më tepër, Ina pretendon se ai ka destabilizuar gjendjen emocionale të këngëtares duke i thënë gënjeshtra dhe duke e bindur se ai mund të ndikojë në ribashkimin me djalin e saj, Luka, dhe ish-bashkëshortin, Robert Nolfe.
Në mes të këtyre akuzave, aktori ka reaguar përmes një videoje të publikuar në rrjetet sociale, ku shihet duke biseduar në telefon me Parashqevinë. Në video, Herioni shprehet:
“Unë ta thash ty o zemra, Ilirit ti ja merr telefonin dhe i thua dua të flas me Herionin. Ti e pe ça na bënë aty. Vivi dëgjo vëllain, mua mu hapën punë te hoteli se dolën ca llafe që ishin të padëshiruara që s’kishin ndodhur, u shpikën dhe kam shumë probleme zemra më kupto Herionin, se unë dua të jem me ty çdo sekond.”
Gjatë pjesës së telefonatës që aktori ka zgjedhur të bëjë publike, Parashqevia nuk shfaqet e shqetësuar, por flet për planet e saj për të regjistruar një këngë me kitarë.
Sipas mbesës së këngëtares, veprimet e aktorit janë të papranueshme dhe kanë kaluar çdo kufi.
