Që në momentin që doli në kinema më 23 maj, filmi i ri i Tom Cruise, Mission: Impossible – The Final Reckoning, u përfol si “filmi më i shtrenjtë i të gjitha kohërave”. Me një buxhet që arriti në rreth 400 milionë dollarë, produksioni është padyshim një nga më të kushtueshmit në histori. Shpenzimet u rritën nga një sërë faktorësh: pandemia COVID-19, xhirimet e përsëritura dhe grevat e SAG-AFTRA e WGA që ndalën për muaj të tërë Hollywood-in.
Por… a është me të vërtetë ky filmi më i shtrenjtë i 10 viteve të fundit? Jo!
Sipas The Hollywood Reporter, dy filma të tjerë madhështorë e kanë tejkaluar Cruise edhe përpara se pandemia të rrënonte industrinë. Në vitin 2018, Jurassic World: Fallen Kingdom kishte një buxhet gjigand prej 432 milionë dollarësh. Ndërsa rekordin absolut e mban Star Wars: The Force Awakens (2015), me një kosto të raportuar prej 447 milionë dollarësh – dhe disa burime e çojnë shifrën edhe më lart, deri në 533 milionë dollarë.
Sigurisht, këto investime marramendëse nuk ishin kot. Jurassic World: Fallen Kingdom arkëtoi mbi 1.3 miliardë dollarë globalisht, ndërsa The Force Awakens thyen çdo rekord me mbi 2 miliardë dollarë fitime në mbarë botën.
E ndërkohë, filmi i ri i Cruise është ende në garë për të justifikuar shpenzimet e tij marramendëse. Deri tani ka arritur në 363 milionë dollarë arkëtime globale, por mbetet për t’u parë nëse do të kapë shifrat astronomike të rivalëve të tij.
Pra, edhe pse The Final Reckoning është spektakolar dhe i shtrenjtë, historia e kinemasë tregon se gjithmonë ka dikush që ka shpenzuar më shumë.
