Gjatë emisionit “Opinion” të dedikuar gjatë mbrëmjes së sotme veshjes, stilistë dhe personazhe të njohur të ekranit dhe jo vetëm kanë komentuar disa nga gratë e politikës shqiptare sa i përket stilit të veshjes. Përmes panelit të përbërë nga stilisti Joni Peçi, stilisti Valdrin Sahiti, stilistja Rezarta Skifteri, gazetari Reiz Çiço, stilisti Altin Mici,juristja Irina Kita, ish-missi Armina Mevlani dhe Aurela Hoxha janë komentuar edhe mënyra sesi vishen shqiptarët dhe kosovarët.
Komentet kanë nisur me zonjën Arta Dade, e cila është cilësuar si një zonjë e kuruar dhe me klas. Më pas të ftuarit në panel kanë vijuar me zonjën Jozefina Topalli, për të cilën nuk ishin aq entuziast sa i përket veshjes së saj, krahasuar me zonjën Dade. Sipas tyre ajo është një zonjë e bukur, por që nuk i kushton rëndësi pamjes.
E komentuara e radhës ka qenë Presidentja e Kosovës, Ahtifete Jahjaga, stili i së cilës nuk është pëlqyer nga paneli. Sipas tyre ajo nuk është një figurë që evidentohet për modën apo stilin. Ndërkohë deputetja Majlinda Bregu është cilësuar si trendy, por që ndonjëherë e kalon masën. Sipas Valdrinit ajo është një nga femrat e veshura më mirë të politikës shqiptare.
Gjithashtu u komentuan mjaft mirë për mënyrën e të veshurit Kryeministri i vendit Edi Rama, kryetari i opozitës Lulzim Basha dhe ish-kryeministri Sali Berisha.
Jorida Tabaku ka marrë epitetin “Kate Middleton” nga paneli në emision. Sipas tyre ajo vishet mjaft mirë. Drejtoresha e Tatimeve, Briseida Shehaj u cilësua një femër e bukur por brenda kornizës të politikës.
Ndërkohë moderatorja Floriana Garo sipas tyre vishej korrekt edhe me stil, por duke u shfaqur më e madhe se mosha e saj. Gazetarja Iva Tiço është përkufizuar korrekte në veshjen e saj. Personazhi i radhës i komentuar ka qenë fashionista Lori Hoxha. Ajo u cilësua si një femër me shije dhe klas të lindur. Ndërkohë stilistja Enada At’Nikolla evidentohej për stilin guximtar të të veshurit.
