Zyrtarët e kompanisë automobilistike Porsche i janë përgjigjur akuzës së Meadow Rain Walker, vajza e aktorit të ndjerë Paul Walker. Rain kishte njoftuar se kishte vendosur ta padiste kompaninë, veturën e së cilës babai i saj po voziste kur pësoi aksidentin fatal.
“E kemi thënë edhe më parë, na vjen shumë keq kur dikush lëndohet brenda një veture Porsche, por ne besojmë se raportimi i autoriteteve në këtë çështje ka qenë i qartë se aksidenti tragjik ka ndodhur për shkak të ngasjes së pakujdesshme dhe shpejtësisë së tepruar”, thuhet në njoftimin e kompanisë drejtuar “Entertainment Weekly”. Njoftimi vjen si përgjigje e akuzës së avokatit të vajzës së Paul Walkerit, që kishte thënë se “vetura kishte mungesë të veçorive të sigurisë, që ndikuan në shkaktimin e aksidentit”.
Policia kishte konstatuar pas aksidentit të ndodhur në nëntor të 2013-ës se vetura ishte duke ecur në 150 kilometra në orë në zonën ku lejohej vetëm 70km/orë.
