Mbrëmjen e sotme emisioni “Në kurthin e Piter Pan” mbyll siparin për edicionin e dytë dhe të ftuarit e kësaj puntate janë vërtetë të veçantë. Në fillim të emisionit e ftuar speciale ishte Arilena Ara, e cila është një prodhim 100% i televizionit “Klan”. Hapat e parë të karrierës artistja i hodhi në spektaklin e talenteve “Gjeniu i vogël” dhe më pas u bë akoma dhe më e njohur pasi u shpall fituese e “X Factor Albania”. E ftuar sot në “Në kurthin e Piter Pan”, Arilena tha se në “Klan” ndjehet si në shtëpinë e saj dhe më pas u tregua e gatshme t’ju përgjigjej një më një pyetjeve të fëmijëve dhe të Alketës.
Si rrallëherë ajo foli edhe për jetën e saj private, gjë për të cilën Arilena është përfolur shumë pak në media. Kur u pyet nga Alketa nëse pranon aplikime për të dashur, këngëtarja u përgjigj: “Jo jemi plot. Nuk pranojmë aplikime për të dashur. Janë mbyllur”. Nuk e dimë nëse Arilena është në një lidhje apo me këtë përgjigje thjesht deshi të tregojë se në të vërtetë fokusi i saj në këtë momente nuk është pikërisht tek historitë e dashurisë. Ara është ndër të paktët personazhe publikë që nuk është bërë pjesë e mediave rozë për ndonjë marrëdhënie dhe duket se kjo do të vazhdojë gjatë, derisa të ketë diçka konkrete në jetën e saj. /revistawho.com
