Rrugëtimin e saj në televizion Fjoralba Ponari e nisi nga spektakli i muzikës, “The Voice”. Fjoralba spikati jo vetëm për zërin, por edhe për shkathtësinë e saj, ndaj sot i është besuar drejtimi i disa prej programeve më të rëndësishëm në “Top Media”. Këtë sezon ajo u shfaq përkrah Edi Manushit dhe Nevina Shtyllës në drejtimin e emisionit të së dielës, “E Diell”, dhe prej pak ditësh ka nisur një tjetër program të ri në ekranin e “Top News”. Çdo të hënë Fjoralba udhëton në vendet më të bukura të Tiranës, njeh publikun me të rejat e jetës në kryeqytet dhe me nismat e veçanta të të rinjve dhe të rejave. Deri më tani “Ora e Tiranës” ka rezultuar mjaft i suksesshëm si emision, falë aftësisë së Ponarit.
https://www.instagram.com/p/BxqAZQzh0bc/
Së fundmi në një intervistë me ndjekësit e saj në “Instagram’, Fjoralba ka treguar se ky vendim për të drejtuar një emision jashtë studiove televizive ka qenë i mirëmenduar. Kur u pyet se çfarë e shtyu të merrte këtë iniciativë, Fjoralba u përgjigj: “Përveç faktit që do më ndihmonte të njihja me themel jetën në Tiranë, ishte dhe mundësia ideale që të merrja eksperiencën e duhur në gazetarinë e terrenit (meqenëse nuk kemi bërë as shkollë për këtë punë). Nëse përballon një program në terren përballon çdo projekt televizioni në studio, më thanë!”. Kujtojmë se studimet Fjoralba i ka ndjekur për stomatologji, por pasioni për televizionin duket se është akoma dhe më i madh. /revistawho.com
