“Dje ndërrova prefiks dhe çuditeërisht nuk ndihesha aq keq sa mendoja.S’di nëse kam jetuar gjysmën e jetës apo më shumë por të paktën nuk kam pishmane sepse spektaklin e quajtur jetë e kam parë e jetuar deri më tani. Gjatë këtij spektakli kam kuptuar që gjithçka është aq e përkohshme, vitet ecin me rend rritës, rrudhat po ashtu e sado përpiqemi t’i mbulojmë e kamuflojmë, ato janë aty e plakjen s’e lufton dot askush, çështja është të plakemi shëndetshëm e në paqe me veten. Shoqërite ndryshojnë interesa dhe disa miq i ke deri në fund e ca të tjerë deri në një pjesë të rrugëtimit, karriera herë të le në rruge e herë të kap mirë, shkëlqimi (ai skeniku meqë e kam provuar në kurriz), totalisht i përkohshëm, fanset po s’të panë me sy nuk i bie ndërmend për ty. Ama një gjë nuk të lë kurrë gjatë rrugëtimit të jetës; FAMILJA. E madhja dhe e vogla janë aty deri në fund, ndaj duhet të jemi mirënjohës që kemi këtë pasuri, me e madhja nga të gjitha në këtë jetë. Bekimi më i madh”. Këto janë fjalët e prezantueses Gerta Heta, një imazh por edhe zë shumë i dashur i shqiptarëve. Ndër figurat e para të Top-it, si në radio e më vonë edhe në televizion. Gerta sot është një nënë e lumtur 40-vjeçare. E ndoshta pikërisht ardhja e asaj 4-ës, ka bërë që moderatorja të ulet e të reflektojë për të na treguar më pas mësimin e saj nga jeta, me fjalë të thjeshta por shumë të vërteta e domethënëse.
