Shawn Mendes ka njoftuar se do të shtyje me tri javë turneun e tij. Përmes një postimi në “Instagram” ai ka bërë të ditur se do të shkëputet nga aktiviteti profesional për disa kohë.
“Me zemër të thyer e them këtë, por për fat të keq do të më duhet të shtyj tri javët e ardhshme të shfaqjeve deri në njoftimin e mëtejshëm. Kam qenë në turne që kur isha 15 vjeç dhe për të qenë i sinqertë ka qenë gjithmonë e vështirë të jesh në rrugë larg miqve dhe familjes. Pas disa vitesh larg njerëzve të dashur, u ndjeva sikur isha gati të zhytesha përsëri”, ka shkruar midis të tjerash këngëtari.
Ai ka theksuar se do të konsultohet me ekipin e profesionistëve të shëndetit, për të pasur mundësi të kujdeset për shëndetin e tij mendor. Do të jenë ata që do të vendosin sa kohë i duhet artistit për t’u shëruar. Këngëtari e nisi turneun e tij më 27 qershor të këtij vitit.
