Duken miqësorë, të qeshur me njëri- tjetrin por çdonjëri prej tyre tani më shumë se kurrë synon ta mposhtë tjetrin, e të kalojë vetë në natën finale. Rrethi është ngushtuar shumë. Vetëm dy prej tyre do të shkojnë drejt çmimit të madh. Në këtë edicion të 5-të, The Voice of Albania po surprizon edhe vetë konkurrentët me formulat e reja të garës, të cilat e kanë shtuar edhe më shumë ankthin drejt fitores. Pas betejave të kryqëzuara që i përballën për herë të parë konkurrentet jashtë skuadrave, tashmë nis një sfide tjetër e re, kjo e gjysmëfinales së kësaj të premte, që premton sfidë të fortë, shumë spektakël e pafund emocione. Të katërt janë “të rrezikshëm”. Të katërt janë pretendentë të forte për ta kapërcyer edhe këtë fazë. Njihuni më mirë me ta, përmes profileve të tyre.
Ina Torba
Mosha: 24 vjeç
Vendlindja: Dibër
Vendbanimi: Tiranë
Shkollimi: Inxhinieri Ndërtimi
E vetmja vajzë gjysmëfinaliste dhe e vetmja konkurrente e skuadrës së Alma Bektashit, që i rezistoi furtunës së fundit të përzgjedhjes nga publiku. Sikur ta dinte që gjërat do kishin shkuar kaq mirë, patjetër që do kishte ardhur më e sigurt në audicionet e fshehura. Por ja që nuk ndodhi aspak kështu. E sollën miqtë e saj gati me zor. Sepse Ina kishte vendosur të mos shkelte më në një skenë të tillë, pas një eksperience të ngjashme që nuk i la shije të mirë. Dhe miqtë saj bënë tamam atë që duhej. Sepse Ina jo vetëm që e rifitoi rrugës sigurinë, por u tregoi edhe konkurrentëve të tjerë se përballja me të nuk do ishte aspak e lehtë. Është kthyer në një personazh jo vetëm për shkak të zërit, por edhe për karakterin e saj të shpenguar e plot humor që e shfaq klip pas klipi. Ja ku i ka ardhur radha misionit të saj më të vështirë: të qëndrojë e fortë deri në fund, si e vetmja e mbijetuar e skuadrës së saj.
Elbunit Krasniqi
Mosha: 22 vjeç
Vendlindja: Prishtinë
Vendbanimi: Prishtinë
Shkollimi: Mjekësi e përgjithshme
Ai nuk është vetëm një nga zbulimet e “The Voice of Albania 5”. Mbi të gjitha vetë ai ka zbuluar tek vetja një talent as që e dinte që e kishte dhe që e kishte të pamundur ta diktonte aty në dhomën e vet, teksa luante në kitarë e këndonte i vetëm brenda katër mureve të shtëpisë. Mjaftoi vetëm të dëgjontë zërin e dëshirës së tij të fshehur dhe pak guxim për t’u përballur me qindra të tjerë, që mjeku i ardhshëm nga Prishtina jo vetëm të kalonte fazat e para, por të arrinte deri në fund. Pa bujë të madhe, pa rrëfyer emocionetë forta, me kitarën që s’e lëshon nga duart e me atë qetësinë e tij të hekurt që nuk e humbet për asnjë moment, Elbunit Krasniqi, i vetmi i skuadrës së Gencit, është gati të përballet me këdo që i del përpara. Të tregojë në çdo rast seriozitet dhe profesionalizëm dhe ambicie të fortë. Si përherë pa zhurmë të madhe, vetëm me zërin e tij që nuk ka lënë askënd indiferent.
Tiri Gjoci
Mosha: 22 vjeç
Vendlindja: Kavajë
Vendbanimi: Tiranë
Shkollimi: Muzikologji
Në “The Voice of Albania” kemi pasur shumë nga ata konkurrentët që skenën e kanë provuar edhe më herët. Kanë provuar edhe festivalet, edhe klipet dhe koncertet live. Por iu është dashur gjithsesi një lloj tjetër promovimi e gare. Dhe e kanë gjetur tamam në “The Voice”. Tiri është njëri nga ata. Ka një grup të tijin muzikor, ka një CV të pasur me konkurrime nëpër kompeticione të mëdha, ka dalë shumë herë në ekran dhe studion për muzikologji në Akademinë e Arteve. E megjithatë ka vendosur të vijë e të përballet si gjithë të tjerët. Pa grupin dhe pa përvojën. Vetëm me zërin e tij. Por edhe me natyrën e qetë po shumë të sigurt, që rrallë e humb toruan. Tiri i ka idetë e qarta. E di mirë se çfarë kërkon dhe bën të pamundurën për ta arritur. Sepse është mësuar të luftojë fort, siç është mësuar edhe të përpiqet të dalë në krye i vetëm, që kur vendosi të lërë qytetin e tij të vogël të Kavajës për të kërkuar famën në kryeqytet.
Lorenc Hasrama
Mosha: 18 vjeç
Vendlindja: Tiranë
Vendbanimi: Tiranë
Shkollimi: violë në Liceun Artistik
Që kur u shfaq për herë të parë në audicionet e fshehura, me qëllimin e qartë që të bënte të njohur veten dhe grupin e tij muzikor, Lorenci i çmendi karriget e trajnerëve dhe shijoi i kënaqur luftën e tyre për ta rrëmbyër kush e kush më parë. Ia doli Sidriti ta rekrutonte. I kaloi me aq lehtësi fazat e shoët dhe ja ku është tani, në gjysmëfinale. Para se të dalë në skenë nuk e zë vendi, ka emocione e padurim. Ai është më i vogli nga të mbeturit. Ama duket aq i madh kur del në skenë. Është ndër të vetmit që kërcen e këndon gjithë siguri, por edhe që gati qan kur e kalon edhe një fazë. Sepse i pëlqen t’i përjetojë fort të gjitha: edhe ethet e garës, edhe padurimin e skenës edhe shijen e mirë të fitores. E tani shpreson, ashtu si tre të mbeturit e tjerë, të shijojë finalen e të ëndërrojë fitoren.
