Përzgjedhja e Estonisë për Eurovision 2025 ka ndezur debat në Itali, ku shumë po kërkojnë që kënga të hiqet nga gara.
Reperi Tommy Cash do të përfaqësojë Estoninë me këngën “Espresso Macchiato”, por teksti i saj, i mbushur me stereotipe mbi italianët, ka shkaktuar zemërim. Kënga përmend fraza të ekzagjeruara, referenca për kulturën e kafesë dhe madje edhe histori të lidhura me mafian.
Në vargjet e saj, Cash këndon: “Ciao bella, unë jam Tomaso, i varur nga duhani. Më pëlqen kafeja shumë e rëndësishme”, ndërsa më tej shton: *“Djersitem si mafioz. Jeta është si spageti, është e vështirë derisa t’ia dalësh.”
Mediat italiane e kanë quajtur këngën një “provokim të qartë”, veçanërisht pasi reperi e performoi për herë të parë duke pirë kafe nga një filxhan ekspres.
Reagimet nuk kanë munguar as nga autoritetet italiane. Shoqata e konsumatorëve Codacons ka kërkuar ndërhyrjen e Unionit Evropian të Transmetuesve për të shqyrtuar nëse një këngë që “ofendon një vend dhe një komunitet të tërë” duhet të lejohet në garë.
Ndërkohë, nënkryetari i Senatit italian, Gian Marco Centinaio, ka bërë thirrje për skualifikimin e këngës nga Eurovision 2025. *“Nuk mund të lejojmë që një këngë që përforcon stereotipet negative për vendin tonë të konkurrojë në një ngjarje kaq të madhe ndërkombëtare”*, ka deklaruar ai.
Pavarësisht polemikave, organizatorët e Eurovision ende nuk kanë dhënë një përgjigje zyrtare lidhur me këtë çështje.
