Festat e fundvitit nuk janë vetëm periudhë gëzimi dhe reflektimi. Me ndërrimin e viteve dhe atmosferën nostalgjike që mbizotëron, mund të ndodhë të merrni një mesazh nga një ish-partner që mendonit se ishte harruar prej kohësh.
Mesazhi tipik që mund të merrni është i shkurtër, ndonjëherë i shoqëruar me një batutë apo një pseudonim që përdornit dikur, si “Po mendoja për ty” dhe një urim standard “Gëzuar Vitin e Ri”.
Por, çfarë qëllimi ka ky mesazh nga ish-i?
Kjo nuk do të thotë domosdoshmërish se personi ka mbetur vetëm dhe kërkon shoqëri për natën e fundvitit. Ndonjëherë, shpirti i festave mund të bëjë që njerëzit të ndihen më të hapur për të shprehur ndjenjat e tyre, të ndihen nostalgjikë, ose të përballen dhe me vetminë.
Sipas një studimi të publikuar në “Mashable” në vitin 2017, festat shpesh shkaktojnë ndjenja vetmie, stresi ose mërzitjeje. Këto emocione mund t’i nxisin njerëzit të kërkojnë lidhje emocionale, qoftë edhe përmes një mesazhi të shkurtër dërguar një ish-partneri. Ky fenomen njihet si “Marleying” – kur një ish rikthehet papritur me një urim festiv, duke u përpjekur të rihapë një derë të mbyllur.
Festat dhe “fantazia e dashurisë”
Gjithashtu, atmosfera festive na bën të ndikohemi nga idealizimi i marrëdhënieve, sidomos përmes imazheve të përkryera të çifteve në rrjetet sociale ose filmave festivë. Ky ideal i lumturisë në çift mund të nxisë ndjenja nostalgjie për një lidhje të kaluar, duke bërë që ish-partnerët të kërkojnë ngushëllim emocional.
A duhet t’i përgjigjeni?
Ndërkohë që është e zakonshme të ndiheni të detyruar të përgjigjeni gjatë kësaj periudhe, është e rëndësishme të mendoni për emocionet tuaja. Kontaktet me ish-partnerët gjatë festave mund të ngjallin ndjenja të përziera, duke ju çuar në situata që mund të mos jenë të shëndetshme. Nëse një mesazh nga e kaluara sjell më shumë shqetësim sesa gëzim, ndoshta është më mirë ta lini pa përgjigje.
Festat mund të jenë një kohë për të përqafuar të tashmen dhe për të ndërtuar kujtime të reja, në vend që të riktheheni në të shkuarën. Nostalgjia është një ndjenjë e natyrshme, por është zgjedhja juaj nëse dëshironi t’i hapni dyert e së kaluarës apo të ecni përpara.
