70 vite në fron, një jetë kushtuar vendit të saj. Por me vdekjen e mbretëreshës ndryshojnë shumë gjëra. Që prej shpalljes së Charles-it mbret. Nga himni kombëtar te kartëmonedhat dhe vulat e deri te pasaportat, ndryshimet do të jenë të dukshme.
Monedha dhe pulla
Të 29 miliardë monedhat që qarkullojnë në Mbretërinë e Bashkuar kanë kokën e mbretëreshës. Portreti i fundit i saj në to daton në vitin 2015, kur ishte 88 vjeçe. Ishte portreti i pestë i krijuar gjatë mbretërimit të saj.
Fytyra e mbretit Charles III do të fillojë të shfaqet në monedha dhe kartëmonedha në Mbretërinë e Bashkuar dhe vende të tjera anembanë botës, duke zëvendësuar fytyrën e Elizabeth II.
Drejtimi i shikimit të tij do të jetë i kundërt me atë të mbretëreshës. Kjo, pasi tradita kërkon që drejtimi të jetë i ndryshëm për çdo monark.
Figura e tij do të shfaqet gjithashtu në disa monedha të tjera të përdorura në Karaibe, Kanada, Australi dhe Zelandën e Re.
Fytyra e Elisabeth II shfaqet gjithashtu në pullat postare dhe akronimi EIIR, për Elizabeth II Regina, është ngjitur në kutitë postare, kështu që edhe kjo do të duhet të ndryshohet. Kjo vlen edhe për shenjat në helmetat e policisë.
“Zot mbroje mbretëreshën”
Himni kombëtar anglez, më parë “God Save The Queen”, do të bëhet “God Save The King” (Zoti e ruajtë mbretëreshën/mbretin).
Përsa i përket pasaportave, do të ndryshojë teksti ,që i referohet Madhërisë së Saj, në pjesën e brendshme.
Garda e mbretëreshës do të ndryshojë gjithashtu emrin e saj.
Policia nuk do të ruajë më paqen e mbretëreshës, por atë të mbretit, dhe zyra e avokatëve do të ndryshojë nga “QC (“Këshilli i Mbretëreshës”) në KC (“Këshilli i Mbretit”).
Nga shishet e salcës, pakot e drithërave e deri parfumet, britanikët kanë parë stemën mbretërore, shoqëruar me diçiturën “Autorizuar nga Madhëria e Saj, mbretëresha”. Ajo gjendet edhe në shumë produkte të tjera e madje artikuj shtëpiakë.
Ato janë produkte që kanë marrë një “Mandat Mbretëror”, që do të thotë se kompania që i prodhon furnizon edhe familjen mbretërore.
