Për të gjithë ata që kanë menduar të pushojnë gjysmën e dytë të muajit korrik, nga meteorologët ka lajme të mira. Pas motit me vranësira e shira këtë fundjavë, java pritet të ketë kthjellime. Kështu, nga shërbimi Meteoalb mësohet se fillimi i javës do të ketë kthjellime. Dita e hënë do të karakterizohet nga kthjellime dhe vranësira kalimtare të cilat do të dominojnë në bregdet dhe zonat e ulëta, por kthjellime dhe vranësira të shpeshta do të ketë edhe në zonat jugore dhe lindore. Pasditja e së hënës vijon me kthjellime në gjithë Ultësirën Perëndimore, ndërsa me vranësira të dukshme paraqiten zonat lindore – juglindore.
Në mbrëmje dhe gjatë natës, vranësirat largohen nga zonat lindore duke e lënë territorin me mot kryesisht të kthjellët. Temperaturat e ajrit mbeten konstante gjatë mëngjesit, por një rritje të lehtë do të sjellë mesdita. Era mbetet problematike duke fryrë mesatare deri e fortë me shpejtësi 45 km/h nga drejtimi verior, për pasojë deti do vijojë me dallgëzim 3 – 4 ballë.
Ndërsa për javën që vjen (17 – 23 korrik 2017), meteorologët parashikojnë mot kryesisht të kthjellët, por vranësira kalimtare në zonat malore duke rrezikuar shira të pakët, kryesisht në zonat malore, veriore dhe lindore. Temperaturat të hënën dhe të martën mbeten thuajse konstante, ndërsa nga e mërkura dhe në vijim pritet rritje e lehtë e graduale duke bërë që në fundjavën e ardhshme, termometri të ngjitet mbi 35 gradë C.
Era dhe dallgëzimi mbeten problematike ditën e hënë deri në mbrëmje kur parashikohet dobësim i ndjeshëm i erës deri në 28 km/h, duke bërë që në brigjet detare të ketë dallgëzim deri 2 ballë, në të njëjtat parametra mbetet era dhe dallgëzimi deri në fundjavë./Class
