Që të puthen në buzë dy aktorë meshkuj në Teatrin Kombëtar, është e rrallë, aq më tepër kur bëhet fjalë për dy karaktere antagonistë. Kjo ka ndodhur në dramën ‘Tri motrat” të Çehovit që po hsfaqet në Teatrin Kombëtar, nën regjinë e Hervin Çulit. Një ndër pikat më kulmore të shfaqjes ishte dhe puthja mes baronit interpretuar nga Neritan Liçaj dhe Saljonijit, interpretuar nga Gerti Ferra. “Nuk e di nëse Hervini e kish menduar qysh më parë, por teksa po provonim skenën e dehjes bashkë me Gertin, një moment ai thotë “puthe në buzë”, dhe unë e putha”, ka thënë për “Panorama” aktori Neritan Liçaj. Më tej një nga protagonistët e shfaqjes është shprehur se puthja në buzë midis dy meshkujve është traditë ruse. “Është më se e zakonshme në traditën ruse. Qëllimi i saj në shfaqje ishte për të dhënë shpirtin rus dhe atë sharmin çehovian”, është shprehur Liçaj.
