Këngëtarja Eneda Tarifa ka ndarë një kapitull të ndërlikuar të jetës së saj gjatë një interviste në emisionin “Natën me Aulonën”. Ajo ka treguar për herë të parë se, pa e kuptuar në fillim, kishte kaluar një periudhë depresioni që ndikoi thellësisht në gjendjen e saj emocionale dhe mendore.
Edhe pse e rezervuar për të zbuluar shkaqet e sakta të kësaj gjendjeje, Eneda rrëfeu se ky ishte një moment i vështirë dhe sfidues, që e bëri të vinte në pikëpyetje edhe vetë ekzistencën e saj. Ajo pranoi se vetëm pasi e kishte kaluar këtë fazë, kishte arritur të kuptonte simptomat dhe ndjesitë që e kishin pushtuar, ndërsa nënvizoi rëndësinë e kërkimit të ndihmës profesionale.
“Në atë kohë nuk e dija që po përjetoja depresion,” tha ajo. “Por simptomat ishin aty – mendime ankthi, frikë për jetën dhe pyetje ekzistenciale si ‘Pse jam këtu? Pse ekzistoj?’ Nuk ishte një depresion i rëndë, por gjithsesi një periudhë shumë e ndërlikuar për mua. Mendoj se këto janë ndjesi që çdo njeri mund t’i përjetojë në një moment të caktuar.” tha ajo.
Edhe pse e vetëdijshme për nevojën e ndihmës, Eneda pranoi se nuk kishte arritur ta kalonte barrierën e të kërkuarit mbështetje profesionale.
“Kam menduar shumë herë të shkoj te një psikolog,” tha ajo. “Madje kam bërë edhe orare, por gjithmonë në momentin e fundit ndryshoja mendjen. Nuk kam qenë gati të hapem dhe të tregoj atë që kam brenda meje. Ndoshta kjo lidhet edhe me mentalitetin tonë, pasi ende ekziston një ndjesi se kërkimi i ndihmës psikologjike është një dobësi,” tha Eneda.
Rrëfimi i sinqertë i Eneda Tarifës hedh dritë mbi sfidat e shëndetit mendor dhe nevojën për ta normalizuar kërkimin e ndihmës profesionale.
