Qytetet prej kockash, ja si duken

Industria e ndërtimit sot varet krejtësisht nga materialet inerte, që përveç kostos së prodhimit kanë edhe një kosto të lartë mjedisore dhe fajësohen shpesh si një ndër shkaktarët më të mëdhenj të ngrohjes globale. Për prodhimin e këtyre materialeve, si tulla, hekur, beton apo xham nevojitet një energji e madhe që çliron në mjedis agjentë ndotës të mëdhenj. Për këtë, ekspertët besojnë se ka ardhur koha që njerëzimit të mendojë për burime alternative për t’i zëvendësuar në industrinë e ndërtimit. E mes këtyre burimeve alternative vendosen kockat artificiale dhe që vetëshërohen. Shembuj të tyre të ndërthurura me materiale sintetike ka plot nëpër laboratorët e shkencëtarëve. “Natyra dhe inxhinierët veprojnë krejtësisht ndryshe. Natyra i zgjidh problemet me informacion, me dije, ndërsa inxhinierët me energji, me djegie, me ndotje. Të gjitha ndërtesat standarde janë të ngritura me inerte, çelik dhe hekur në mendjen tonë. Duhet të ndryshojmë mentalitet nëse duam që të bëjmë një ndryshim të madh në këtë fushë”, thotë Michelle Oyen nga Departamenti i Inxhinierisë në Universitetin e Kembrixhit. Ajo ka arritur të ndërtojë në laborator kocka dhe lëvozhga vezësh dhe procesi i ndërtimit të tyre bëhet me temperaturën e mjedisit. “Tek kocka, mineralet garantojnë ngurtësinë, ndërsa proteinat thyrjen, shembjen”, thotë ajo. Michelle Oyen shton se përveç garantimit të një materiali të fortë, kjo metodë është krejtësisht miqësore me mjedisin dhe vetëshëruese, por ka një problem të madh për momentin; ende nuk është arritur teknologjia e prodhimit masiv të tyre.