Rama ka një apel për kuqezinjtë dhe tifozët

Kreu i qeverisë Edi Rama ka komentuar në rrjetin social Facebook në lidhje me ndeshjen që luhet sot për kampionatin Europian “France 2016” mes Shqipërisë dhe Francës. Kryeministri thotë se ndeshja është mjaft e vështirë përballë një skuadre historike si ajo franceze. Por ai nuk përjashton mundësinë për fitore, duke këshilluar lojtarët kuqezinj që të çlirohen nga emocionet që i penalizuan gjatë ndeshjes me Zvicrën. Rama ka evidentuar se futbollistët duhet të mos ndjejnë presionin e përgjegjësisë që dashur pa dashur i është vënë nga të gjithë sportdashësit që presin shumë nga përfaqësimi për herë të parë i Shqipërisë në një kampionat europian. Të njëjtin apel shefi i mazhorancës ja drejton edhe tifozëve të cilët sipas tij duhet të mirëpresin çdo rezultat. “Sonte sprova e dytë e Kuqezinjve. Super e vështirë po asgjë s’është e pamundur nëse djemtë e mrekullueshëm të Kombëtares do të hyjnë në fushë të çliruar nga presioni i jashtëzakonshëm i përgjegjësisë, që i pengoi të luanin lirisht në gjysmën e pjesës së parë të ndeshjes me Zvicrën dhe të ishin të kthjellët në rastet e pastra vetëm për vetëm përballë portierit… Le t’u çojmë me një like mesazhin e mbështetjes sonë të pakushtëzuar nga rezultati dhe cilidoqoftë rezultati, ata mbeten heronjtë e padiskutueshëm të këtij momenti magjik të futbollit tonë ‪#‎ForcaShqiperia në fushën e lojës dhe në shkallët e stadiumit ku tifozët kuqezinj bënë të flitet me superlativa për kulturën sportive që shfaqën para, gjatë dhe pas ndeshjes së parë me Zvicrën”-shkruan Rama në rrjetin social.