Reagon familja e Michael Jackson, realizojnë vetë një dokumentar për të hedhur poshtë akuzat ndaj këngëtarit

Dokumentari “Leaving Neverland”, që zbulonte trajtimin e keq të Michael Jackson ndaj dy fëmijëve, ka tronditur mbarë opinionin publik. Familja e këngëtarit nuk i pranoi asnjëherë akuzat, madje së fundmi kanë realizuar vetë një tjetër dokumentar për të përgënjeshtruar atë të “HBO”. Dokumentari zgjat 30 minuta dhe shërben si një formë investigimi për “Leaving Neverland”. Ky dokumentar i familjes Jackson është realizuar nga Eli Pedraza dhe është publikuar në 30 mars në ‘Youtube’. “Neverland Firsthand: Investigating the Michael Jackson Documentary” ka si qëllim të hedhë poshtë deklartat e dy djemve që tregonin se si i kishte trajtuar Michael kur ishin fëmijë. Në dokumentarin prej 30 minutash shfaqet nipi i këngëtarit, Taj Jackson, mbesa Brandi Jackson, si dhe regjisori teknik Brad Sundberg, i cili ka qëndruar në fermën e Neverland të Michael. Sundberg ka treguar se në fermën e këngëtarit nuk ka parë asnjëherë fëmijë që të ndjeheshin keq apo të stresuar prej tij. Ndërsa mbesa e Michael ka zbuluar se njërin nga djemtë e njeh shumë mirë dhe e di se ka deklaruar vetëm për përfitime personale. Tashmë nuk dihet ende e vërteta, por kujtojmë se Michael Jackson ka rënë shpesh pre e akuzave të tilla, të cilat nuk janë vërtetuar asnjëherë. /revistawho.com