“Me mu” titullohet projekti më i ri i reperit Gold Ag, të cilin e solli në bashkëpunim me motrat Koçi, Greta dhe Eni. Ky projekt mori pëlqyeshmërinë e publikut duke arritur një numër të madh klikimesh në vetëm pak orë nga publikimi. Me gjithë komentet pozitive, kënga mori kritika për jo origjinalitetin e saj duke u cilësuar si e vjedhur nga një këngë bullgare e titulluar “Tu”. Për Telegrafin, Gold Ag tha të mos ketë qenë në dijeni se kjo këngë është kënduar më parë nga dikush. “Beatin e ka bërë Chipsi e neve na pëlqeu. Unë nuk mundem t’i njoh të gjitha këngët e botës. Këndimi im, i Gretës dhe Enit tregon se s’e kemi pasur idenë se si mund të këndohet ndryshe ose si është kënduar më herët”, sqaroi reperi duke thënë se në të tilla raste këngëtari është ai që ka faj më së paku. “Në raste të tilla ai që ka faj është më së paku këngëtari. Unë jap llogari për vijën melodike dhe tekstin. Këngët sot blihen në shumë mënyra në internet, në mënyra të ligjshme. Kjo është hera e parë që më ndodh me një këngë dhe shpresoj të jetë e fundit”. Artisti në fund shprehet i kënaqur për pëlqyeshmërin e këngës duke falënderuar edhe ata që e kritikuan, pasi sipas tij pa kritika një artist nuk mund të forcohet kurrë.
