Pas polemikave që shkaktoi statusi i këngëtarit Devis Xherahu, Rozana i tha dy fjalë në emisionin “E diela shqiptare”, por ato nuk kanë mjaftuar, pasi këngëtarja mbrëmjen e djeshme shkruajti një status ku shpjegoi si ndihej në lidhje me këtë gjë. “Dikush u mundua të ma prishte këtë gëzim pasi më votoi më quajti jo këngëtare! Nuk jam fajtore as unë as dikush tjetër që nuk u mjaftuan pikët e tua për të hipur në atë skenë sërisht në natën finale.”-shkruan ajo. Lexoni statusin e plotë:
“Mirëmbrëma! Sapo u ula në shtëpinë time (Premtoj që do t’i lexoj të gjitha) Ka qënë një mbrëmje e mbushur me emocion! Kënga “Ma thuaj ti” lindi në studion e kompozitorit Elgit Doda. Të dy vendosëm të vinim me një temë e cila është shumë aktuale në ditët që po jetojmë. Dhuna në familje! Gruaja e këngës sime është një grua e fortë ashtu siç duhet të jenë të gjitha gratë në situata të tilla. Në jetën time nuk kam takuar asnjëherë një femër që nuk është e fortë, por ndonjëherë ato nuk dinë ta tregojnë forcën që kanë. Duhet një tragjedi që një femër të shfaqë forcën e saj. Mesazhi im është që ta shfaqni forcën para tragjedisë. Jam shumë e nderuar që artistët e votuan masivisht këtë këngë. I përulem publikut i cili më dha një sadisfaksion të madh që s’do ta harroj gjatë gjithë jetës sime. Unë nuk jam soprano, jam këngëtare siç janë shumë të tillë nëpër botë. Kam vokalin tim, karateristikën time të zërit dhe natyrën e këngëve të mia. Dikush u mundua të ma prishte këtë gëzim pasi më votoi më quajti jo këngëtare! Nuk jam fajtore as unë as dikush tjetër që nuk u mjaftuan pikët e tua për të hipur në atë skenë sërisht në natën finale. Nuk votoj vetëm unë në këtë festival janë vota artistësh të vërtetë e jo “të pa shkollë” siç i quajte ti. Mos harro votën më të rëndësishme, duartrokitjet e publikut. Aty e kishe skenën, dole u përballe me publikun pse nuk ja more duartrokitjet si shumë të tjerë që ishin në atë skenë? Unë nuk ja blej dot publikut duartrokitjet. Publiku o të do o s’të do, nuk bën kompromis. Natyrisht që nuk shqetësohem nëse mënyra e të kënduarit tim e frikëson. Tipi i mashkullit që frikësohet nga personaliteti im artistik është pikërisht tipi për të cilin nuk do doja të shtoja më asgjë. Përulem para jush publiku im. Jam e bekuar që ju kam. Ju dua!”
