Revistawho.com sjell çdo javë receta të ndryshme gatimi nga shefi i njohur i kuzhinës, Renato Mekolli. Njihuni me dy recetat e radhës.
Fileto levreku me erëza
4 fileto levreku
1 kg spinaq
100 g brokoli
100 g gjalpë
2 limonë
Gjysmë speci jeshil
Gjysmë speci të kuq
1 kungull jeshil
1 karotë
1 qepë të thatë
1 qepë të njomë
2 thelpinj hudhre
Pak trumzë (thimo)
Pak rozmarinë
Vaj ulliri
Kripë
Piper
Pastrojmë dhe filetojmë peshkun, i hedhim kripë dhe piper dhe e lëmë të marinohet për 30 minuta. Lajmë dhe presim të gjitha perimet (përveç spinaqit), i kalojmë në tigan në temperaturë shumë të ulët me kapak të mbyllur, që të fillojnë të zbuten dhe i lëmë mënjanë. Në një tenxhere vlojmë ujë, vëmë gjethet e spinaqit dhe i ziejmë për 5 minuta. Ashtu të ngrohtë e kalojmë në multi me gjysmën e lëngut të limonit, gjysmën e sasisë së gjalpit, kripën dhe piperin. Në një tigan skuqim fileton e levrekut dhe fillojmë dekorin e pjatës, duke shtruar fillimisht kremin e spinaqit, perimet me gjalpin dhe me lëngun e limonit që ka tepruar dhe sipër tyre vendosim filetot e levrekut.
Brumë për krepa
200 g miell 55%
25 g gjalpë
70 g sheqer
300 ml qumësht
2 vezë
1 lugë gjelle lëng portokalli
Pak kripë
1 bishtajë vaniljeje
1 lugë kakao
I përziejmë të gjithë përbërësit bashkë në një enë dhe më pas i kullojmë, për të shmangur papastërtitë ose copat e brumit që mund të kenë mbetur. E lëmë brumin të çlodhet për 30 minuta dhe më pas ai është gati. Duhet bërë kujdes gjatë pjekjes së krepave, pasi duhet përdorur tigan që nuk ngjit dhe yndyra që hidhet është jashtëzakonisht e vogël (mundësisht të lyhet një pecetë me vaj dhe të kalohet në tigan). Masa e brumit hidhet në tigan duke përhapur dhe ajo duhet të jetë e vogël, që krepi të dalë sa më e hollë./revistawho.com
