Revistawho.com sjell çdo javë receta të ndryshme gatimi nga shefi i njohur i kuzhinës, Renato Mekolli. Njihuni me dy recetat e radhës.
Sallatë jeshile me misër, majonezë e mustardë
1 tufë sallatë jeshile
Pak sallatë e kuqe
200 gramë misër i zier
1 qepë e njomë
1 mollë
Kripë
Piper
1 tufë majdanoz
Për salcën: 50 ml vaj ulliri, gjysmë limoni, 1 lugë majonezë, 2 lugë kos
Përziejmë të gjithë përbërësit e salcës (në grirës elektronik) dhe e lëmë mënjanë. Lahet sallata, kullohet dhe pritet me dorë në copa të vogla. E vendosim në një enë e në të shtojmë qepën e njomë dhe majdanozin të prerë hollë, mollën e prerë në kubikë, misrin dhe i përziejmë lehtë. Atyre u shtojmë dhe salcën dhe i përziejmë përsëri.
Brusketa me djathë të bardhë
Disa feta bukë
100 gr sallam pikant
100 gr domate qershi
100 gr djathë i bardhë
1 spec jeshil
1 spec djegës
3 qepujka të grira hollë
2 thelpinj hudhre
1 lugë kaperi
4 ullinj pa bërthamë
1 tufë borzilok
1 lugë rigon
Kripë
Piper
Për brusketat është e preferueshme të përdoret franxhollë ose bagetë (franceze), por në pamundësi, edhe bukë normale ose dietike. Vëmë të thekim bukët (mirë është në furrë). Perimet dhe ullinjtë i grijmë hollë, domaten e presim në dysh, djathin e grijmë në rende. Në një enë përziejmë të gjithë përbërësit përveç domateve. Shtrojmë bukët në një pjatë dhe sipër u hedhim masën e përzier dhe domatet me sallam pikant./revistawho.com
