Revistawho.com sjell çdo javë receta të ndryshme gatimi nga shefi i njohur i kuzhinës, Renato Mekolli. Njihuni me dy recetat e radhës.
Përbërësit për salmonin
800gr fileto salmoni
Gjysmë speci jeshil
2 domate
3 thelpinj hudhër
1 spec djegës
Gjysmë qepe
Gjysmë speci jeshil
Gjysmë speci të verdhë
1 tufë majdanoz
Pak selino
Kripë
Piper
Vaj ulliri
Përgatitja e salmonit
Presim salmonin në fileto (4 pjesë) dhe i hedhim kripë piper, presim perimet në rripa për së gjati dhe domatet e prera në kube. Në një tenxhere me temperaturë të mesme vendosim salmonin dhe i japim një pjekje të shpejtë nga të dyja anët. E heqim salmonin mënjanë dhe në po atë tenxhere vendosim të gjitha perimet, përveç domates dhe majdanozit. Sapo të kenë marrë një faqe të shpejtë, hedhim domatet, majdanozin dhe në fund salmonin. Vazhdojmë gatimin edhe për 10 minuta, që të gjithë përbërësit të marrin shijen e njëri-tjetrit.
Në pjatën që do ta shërbejmë e shoqërojmë me purenë e patateve.
Përbërësit e puresë
4 patate
1 filxhan kafeje qumësht
2 thelpinj hudhër
Pak arrë moskat
Pak rozmarinë
Trumzë
Pak gjalpë
Kripë
Piper
Përgatitja e puresë
Vendosim patatet të ziejnë në temperaturë të ulët, i kullojmë, i futim menjëherë në ujë të ftohtë dhe i qërojmë.
I shtypim me paisjen e puresë (ose në pamundësi me pirun), i vëmë në tenxhere të ziejnë duke shtuar edhe përbërësit e tjerë e duke i përzier derisa të lidhen mirë.
Sallatë me domate-qershi
250gr domate-qershi
100gr djathë dhie
1 qepë e njomë
Kaperi
Ullinj
2 qepujka
Gjysmë speci djegës
Gjysmë speci jeshil
2 feta bukë
Rigon
Kripë piper
Vaj ulliri
Majdanoz
Mendër
Domatet e vogla i presim përgjysmë.
Presim perimet në formë kubi, ndërsa qepët i presim hollë.
Fetat e bukës i presim në kube, u hedhim kripë, piper dhe vaj ulliri, duke i përzier lehtë dhe i kalojmë në tigan me temperaturë të ulët, derisa të thekërrohen.
I përziejmë të gjitha bashkë, që të marrin aromat e shijet e njëra-tjetrës dhe i vendosim në pjatancë duke vënë sipër djathin e dhisë dhe bukën e thekur./revistawho.com
