Revistawho.com sjell çdo javë receta të ndryshme gatimi nga shefi i njohur i kuzhinës, Renato Mekolli. Njihuni me dy recetat e radhës.
Sardele të marinuara
Përbërësit:
1 kg sardele të vogla
1 spec i kuq
1 spec jeshil
1 spec djegës
2 qepë të njoma
2 qepë të thata
200 ml vaj ulliri
200 ml uthull
1 lugë rigon
5 gjethe dafine
Kripë piper
Pastrojmë sardelet duke ju hequr edhe shtyllën kurrizore. I vendosim në një tavë në një shtresë dhe sipër ju vendosim pak kripë të trashë. Presim perimet në rripa dhe i vendosim sipër peshqve të kriposur së bashku me erëzat dhe uthull. I lëmë në frigorifer për tri orë, i kullojmë. I vendosim në një enë tjetër ku i përziejmë me vajin e ullirit dhe i lëmë sërish në frigorifer. Pas 24 orësh sardelet janë të marinuara. Para konsumimit i lëmë në temperaturën e dhomës. Në mënyrë që vaji i ullirit të shkrijë.
Sallatë valeriane me salmon
Përbërësit:
250 gr sallatë valeriane
150 gr salmon i tymosur
Avokado
Tuli i një kokrre portokalli
1 qepë e njomë
1 lugë mustardë
1 lugë limon jeshil
1 tufë kopër
Kripë
Piper
Vaj ulliri
Ena që do të përdorni duhet të jetë e madhe, mundësisht qelqi që t’i nxejë të gjithë përbërësit.
I presim sipas dëshirës avokadon dhe tulin e portokallit, ndërsa koprën dhe qepën i presim hollë. I hedhim ato në tas dhe i përziejmë së bashku me salmonin.
I përziejmë lehtë së bashku me mustardën, vajin e ullirit, kripën dhe piperin. E lëmë masën për 5 minuta që aromat të përhapen më mirë.
E vendosim në një pjatë dhe sipër vendosim sallatën valeriane.
Këshillohet që përzierjet të bëhen me kujdes që produktet të mos dëmtohen. /revistawho.com
