Kristina Bakiu është imazhi i bukurisë shqiptare dhe përfaqësuese e saj në disa kompeticione botërore. Në 2013 u shpall Miss Universe Albania dhe na përfaqësoi denjësisht në kompeticionin botëror ‘Miss Universe’, ndërsa në 2015 ishte përfaqësuese e vendit tonë në ‘Miss World’ në Kinë. Tashmë një nga modelet më të dashura për publikun dhe imazh i shumë firmave të njohura shqiptare, por jo vetëm. Ajo me siguri është frymëzim për shumë vajza përsa i përket formave trupore që ka, jo më kot ne jemi interesuar për këtë pjesë. Ndaj nëse doni të dini si mund ta keni trupin si Kristina ajo na zbulon…
- Në mëngjes esëll konsumoj ujë ose çaj, asgjë tjetër.
- Nuk kam orare të caktuara për të ngrënë duke qenë se edhe ditën nuk e nis asnjëherë në të njëjtin orar.
- Konsumoj 3 vakte.
- Ushqimet që nuk ka ditë mos t’i konsumoj janë perimet dhe frutat, nuk bëj dot pa to.
- Ushtrimet janë në rutinën time ditore. Palestra dhe vrapi më së shumti, të cilat i ushtroj pothuajse çdo ditë.
- Në përgjithësi nuk kam problem me asnjë ushqim, më pëlqejnë dhe mund t’i konsumoj të gjitha gjithmonë në varësi të dietës.
Menyja ditore e Kristinës:
Mëngjes: një vezë e zierë, pak bukë e thekur me gjalpë dhe një lëng frutash të shtrydhur. Më vonë konsumoj kafe ose çaj.
Dreka: sallatë perimesh dhe rizoto me fileto pule. Ka raste që ha dhe pasta sepse janë të preferuarat e mia, por këto me pak limit duke qenë se kanë shumë kalori. Shpesh konsumoj edhe brokoli të zierë me lule lakër.
Mbasdite: Konsumoj ndonjë frut.
Darka: Është shumë e lehtë, një supë dhe sallatë, ose një sallatë dhe pak fileto pule. Ndodh që në darkë ha ndonjëherë, vetëm fruta të thata me kos natyral.
