E premtja 13 konsiderohet si një ditë ogurzezë dhe shumë njerëz në mbarë botën i tremben një date të tillë. Duket se edhe Renato Mekolli është një nga këta persona supersticiozë, që beson se kjo e premte mund të mos i sjellë fat të mirë. Shefi i njohur i kuzhinës ka publikuar një foto simbol të premtes së 13-të dhe përkrah saj ka shkruar: “Unë jam shumë supersticioz. Mos më ngacmoni këtë të premte se vetëm këtë ditë anuloj me lezet punët dhe takimet”.
Siç duket nuk janë vetëm njerëzit e thjeshtë ata që besojnë në bestytni apo legjenda të cilat janë të trashëguara prej shekujsh.
Por çfarë kuptimi ka e premtja 13 dhe përse njerëzit i tremben kaq shumë kësaj dite? Frika e premtes së 13 daton prej shumë shekujsh dhe besohet se buron nga Kodi i Hamurabit, që la jashtë një ligj të 13-të nga kodet e tij të shkruara ligjore. Në realitet ky ishte një gabim i bërë nga njëri prej përkthyesve, që harroi një rresht nga teksti. Shumë mendje të mëdha kanë qenë supersticioze për këtë datë. Për shembull kompozitori Arnold Schoenberg nuk e përdorte numrin 13 në asnjë nga veprat e tij, dhe në rastet kur duhej të shkruante 13 e zëvendësonte me 12a. Për më tepër njerëzit i frikësohen këtij numri, sepse ne kemi 12 muaj në vit, 12 shenja zodiaku, dhe nga kjo datë mbetën 12 ditë nga Krishtlindja. Histeria e vërtetë e të premtes së 13-të nisi në shekullin e 20-të. Shumë e lidhin me librin “E premtja e 13-të” të shkruar nga Thomas Lawson, ku tregohej historia e një shitësi me pakicë të aksioneve që zgjodhi pikërisht këtë ditë për të rrëzuar me qëllim tregun e aksioneve. Psikologët thonë se supersticionet, të tilla si kjo e premtes së 13-të, kanë të bëjnë me përpjekjet për të kontrolluar fatin tonë. Njerëzit shpesh i përdorin bestytnitë për të arritur një rezultat që dëshirojnë apo për të ndihmuar në zbutjen e ankthit. Kjo do të thotë se kjo e premte mund të jetë po aq me fat sa është e pafat, por e gjitha varet nga këndvështrimi juaj. Prandaj në vend që t’i trembeni kësaj dite, përpiquni të kryeni disa rituale që ju bëjnë të ndiheni mirë dhe ta shikoni jetën me pozitivitet. /revistawho.com
