Restoranti më i ri në The Ritz-Carlton Key Biscayne, Miami, po bëhet shpejt një adresë e nxehtë për gastronominë mesdhetare dhe në qendër të tij qëndron Renato Mekolli. Shefi i njohur shqiptar është emëruar Executive Chef i “Paralía”, një koncept i ri i frymëzuar nga bregdeti i Egjeut, që vjen pas rinovimit të madh të hotelit luksoz.
Mekolli ka sjellë në Miami një menu që kombinon freskinë e detit të Floridës me shijet autentike të Greqisë dhe Turqisë. Fokus kryesor janë pjatat me prodhime deti, mezet tradicionale dhe eksperienca e ngrënies buzë oqeanit, e gjithë kjo, nën një estetikë moderne që përqafon frymën e Egjeut.
I njohur gjerësisht për kuzhinën mesdhetare, Renato Mekolli mbërrin në SHBA me një bagazh të pasur ndërkombëtar. Ai është bërë figurë e njohur jo vetëm në gastronomi, por edhe në ekran, si drejtues i “MasterChef Albania” dhe “Hell’s Kitchen Albania”. Eksperienca e tij po e ndihmon të krijojë një prej destinacioneve më tërheqëse kulinare në skenën gjithnjë e më dinamike të Miamit.
“Paralía” premton të jetë një pikëtakim i shijeve të freskëta, atmosferës bregdetare dhe kreativitetit mesdhetar, një vend ku stili i Egjeut takohet me ritmin tropikal të Floridës.
