Ditën e djeshme lajmi se reperi XXXTentacion ka vdekur, tronditi të gjithë botën e muzikës. Pavarësisht se shumë i ri në moshë, vetëm 20 vjeç, ai kishte një karrierë mjaft të suksesshme dhe admirohej edhe nga artistë të tjerë.
Menjëherë pas këtij lajmi, në rrjete sociale ka filluar të qarkullojë një video e reperit në të cilën ai thotë: “Jam gjallë”. Pas kësaj fansat e XXXTentacion kanë filluar të dyshojnë se ai mund të jetë vërtet gjallë. Në këtë video reperi dëgjohet teksa thotë: “Të gjithë duhet të qetësoheni. Askush nuk tha unë kam vdekur. Qetësohuni. Më duhej të nxitoja dhe të postoja, kështu ju nuk do të mendonit se kam vdekur. Nuk dua që ndonjë nga fansat e mi të vrasë veten”. Më pas ai përfundon videon duke thënë: “Nuk kam vdekur”.
Një pjesë e madhe e admiruesve të muzikës së tij kanë filluar të besojnë realisht se ai mund të ketë shpëtuar nga të shtënat me armë të ditës së hënë. Por në fakt kjo video i përket vitit 2017-të, kur reperi bëri një marifet në ‘Instagram’ duke thënë se do të varte veten. Ky akt i tij nxiti shumë reagime në rrjet dhe XXXTentacion bëri këtë video për të shpjeguar se asgjë nuk ishte e vërtetë dhe se nuk dëshironte që ndjekësit e tij ta provonin këtë gjë. /revistawho.com
