Teknologjia sot na ofron përparësi të mëdha, mundësi të jashtëzakonshme, në kohë e hapësirë. Na çon si me magji aty ku duam të jemi, kur në të vërtetë fizikisht nuk do të mundeshim dot të ishim. Ama virtualisht, po. Kjo është një tjetër arritje e rëndësishme në industrinë e komunikimeve elektronike në Shqipëri. Kjo është eksperienca më fantastike që mund të provojmë falë rrjetit Gigabit, rrjetit më i shpejtë të përjetuar deri më sot në tregun tonë.
Nuk është teori e zbërthyer me fjalë, por e provuar konkretisht, në kohë reale, siç ndodhi edhe dje në zyrat qendrore të Vodafone Albania, kur i ftuar për të qenë i pari në këtë eksperiencë, Ministri i Infrastrukturës dhe Energjetikës, z. Damian Gjiknuri mundi të udhëtojë virtualisht në rrugën e Arbrit, një prej projekteve infrastrukturore në ndërtim.
Pa pasur nevojën për të udhëtuar drejt kantierit të ngritur në zonën e Klosit, Ministri Gjiknuri pati mundësinë të monitorojë në kohë reale ecurinë e punimeve në rrugën e Arbrit, nëpërmjet një lidhjeje direkte nga kamera e dronit në syzet VR. Transmetimi live i videos në cilësinë maksimale 4K u mundësua nga kapaciteti i rrjetit Vodafone Gigabit, i aftë për të transmetuar të dhëna në milisekonda, pa vonesa pavarësisht distancave të largëta.
“Ky është një hap përpara për industrinë. Kjo përvojë mund të dëshmojë që koncesionet e rrugëve po punojnë. Ne si qeveri jemi plotësisht të gatshëm për të bashkëpunuar dhe për ta sjellë Shqipërinë në rrugën e re të rrjetit 5G, duke bërë që të gjitha përfitimet e biznesit dhe të individit të kenë qasje në risitë teknologjike “, tha z. Gjiknuri.
Drejtori i Përgjithshëm i Vodafone Albania, z. Achilleas Kanaris tha: “Vodafone ofron kapacitetin, rrjetin global, ekspertizën, inovacionin dhe zgjidhjet e ndërlidhura për të përshpejtuar dhe mundësuar evolucionin digjital. Vodafone po krijon shoqërinë e Gigabit në të gjitha tregjet ku operon, dhe Shqipëria është në të njëjtën udhë të investimeve dhe zhvillimit teknologjik së bashku me tregjet e tjera të mëdha evropiane si Gjermania, Italia, Spanja etj. Rrjeti Gigabit, do të revolucionarizojë tregun, përvojën e biznesit dhe klientit. Ne e quajmë këtë revolucionin e ri industrial, ku fuqizimi ekonomik nëpërmjet risive teknologjike do të ndryshojë përgjithmonë mënyrën se si jetojmë”.
Industritë si shëndetësia, arsimi, logjistika, bujqësia, transporti, energjia dhe shumë të tjerë do të ndryshojnë tërësisht falë këtij revolucioni digjital. Teknologjia në një shoqëri Gigabit do të mundësojë automatizimin më të madh të shërbimeve, inteligjencën artificiale (AI), Internetin e Gjërave (IoT) dhe Vodafone së bashku me qeverinë do të punojnë për t’i sjellë këto përfitime edhe në Shqipëri.
Vodafone po transformohet në një kompani Gigabit, për të udhëhequr këtë revolucion. Deri në vitin 2023, Vodafone Albania do të jetë një lider digjital, duke ofruar zgjidhje teknologjike dhe inovacion të vazhdueshëm në vendin tonë./revistawho.com
