Ministrja e Shëndetësisë dhe Mbrojtjes Sociale, Ogerta Manastirliu ka bërë të ditur me anë të një deklarate për mediat, gjendjen shëndetësore të dy mjekëve të njohur, Dhimitër Kraja dhe Roland Xhaxho.
Sipas ministres, profesor Dhimitër Kraja, babai i Dj Vikit, është shëruar plotësisht, megjithatë teksa kanë folur bashkë ai i ka pohuar se do t’i rikthehet detyrës si mjek.
“Prof. Dhimitër Kraja ka rezultuar negativ nga testimi i fundit, pra është i shëruar dhe gjendja e tij shëndetësore është shumë e mirë. Kur bisedova me të më tha që do të rikthehet në shërbim. Ndërsa prof. Xhaxho është në gjendje të stabilizuar. Sot bisedova me të dhe është duke dhënë një dorë për mjekët e infektivit aty në spital, edhe pse është vetë i prekur. Shembuj të tillë janë frymëzues”, përfundoi Manastirliu.
Ministria e shëndetësisë dhe mbrojtjes sociale ka mbajtur çdo ditë të informuar të gjithë njerëzit mbi shifrat reale të të infektuarëve në të gjithë vendin, duke i kërkuar atyre të respektojnë rregullat e përcaktuara dhe të kujdesen për shëndetin e tyre./revistawho.com
