Një urdhërndalim i ri është ngritur nga autoritetet e Puerto Rikos kundër këngëtarit Ricky Martin, për dhunë në familje. Ky urdhër vjen vetëm pak pasi u padit nga ish-menaxherja e tij. Sipas autoriteteteve vendase, akuza vjen nga një person identiteti i të cilit nuk është bërë i ditur, me të cilin artisti ka pasur një lidhje 7-mujore. Vetëm dy muaj më parë ishin ndarë, ndërsa sipas tij, Ricky nuk e kishte pranuar ndarjen duke e telefonuar vazhdimisht, teksa ka shtuar se i ka shkuar në shtëpi tri herë. Përfaqësuesi ligjor i artistit i ka mohuar akuzat që do të trajtohen në seancën gjyqësore që është caktuar më 21 korrik.
Ricky Martin është i martuar që nga viti 2017 me artistin Jwan Josef. Të dy kanë një djalë dhe një vajzë, ndërsa këngëtari ka edhe binjakë të lindur nga një nënë surrogate, para se të njihte bashkëshortin.
