Rihanna tregoi edhe një herë pse konsiderohet një nga figurat më të dashura të showbiz-it botëror, jo vetëm për muzikën, por edhe për qetësinë dhe sensin e humorit që e karakterizon. Një situatë krejt e papritur, e ndodhur jashtë hotelit luksoz Four Seasons në Nju Jork, u shndërrua brenda pak orësh në një video virale.
Teksa këngëtarja po largohej nga hoteli të premten, më 16 janar, sigurimi i saj doli i pari, ndërsa dera u mbyll menjëherë pas tij, duke e lënë Rihannën për një çast jashtë. Në vend që të reagonte me nervozizëm, artistja 37-vjeçare e mori situatën me sportivitet dhe ironi, duke thënë me buzëqeshje: “Sa zotëri që je”. Pas kësaj, ajo qeshi dhe hipi qetësisht në makinën që e priste.
Pamjet u shpërndanë me shpejtësi në rrjetet sociale, ku fansat e përgëzuan për thjeshtësinë dhe reagimin plot klas, duke e kthyer momentin në një nga episodet më të komentuara të ditës.
Ngjarja përkoi me një periudhë të rëndësishme profesionale për partnerin e saj, A$AP Rocky, i cili atë ditë publikoi albumin e tij të katërt, Don’t Be Dumb. Vetëm një ditë më pas, reperi u ngjit në skenën e Saturday Night Live si i ftuar muzikor, ndërsa çifti u pa së bashku edhe në festën pas emisionit.
Në një intervistë për New York Times Popcast, A$AP Rocky foli për lidhjen e tij me Rihannën, duke zbuluar se ishte nëna e tij ajo që e kishte inkurajuar të afrohej me këngëtaren. Ai e përshkroi atë si një “grua shumë të veçantë” dhe theksoi se takimi i tyre ndodhi pikërisht në momentin e duhur për të dy.
Rihanna dhe A$AP Rocky janë prindër të tre fëmijëve dhe së fundmi këngëtarja ka lënë të kuptohet se familja e tyre mund të zgjerohet edhe më tej, me ardhjen e një fëmije të katërt.
