Nga data 17 maj, në orën 21:00, rikthehet në ekranin e Top Channel emisioni i shumëpëlqyer dhe shpesh i komentuar “Goca dhe Gra”. Pas një pauze të shkurtër, formati vjen me një frymë të re, duke ruajtur thelbin e tij, por me disa ndryshime interesante në panelin e moderatoreve.
Dy prej figurave më të dashura për publikun, Rudina Dembacaj dhe Egla Ceno, do të vazhdojnë të jenë pjesë e pandryshueshme e emisionit. Të dyja aktoret kanë qenë shtyllë e programit, me komentet e tyre të drejtpërdrejta.
Por këtë sezon do të kemi edhe fytyra të reja që premtojnë të sjellin energji ndryshe dhe dinamika të reja në panel. Bëhet fjalë për:
- Gerta Gixhari – ish-banore e “Big Brother VIP 4” dhe moderatore, e njohur për qetësinë dhe mendimet e saj të balancuara.
- Loredana Brati – modele dhe gjithashtu ish-banore e “BBV4”, që ka tërhequr vëmendjen me stilin e saj dhe qëndrimet e drejtpërdrejta.
- Këngëtarja Kleoniki – një prurje artistike që pritet të sjellë një këndvështrim ndryshe në diskutimet që zakonisht prekin tema të nxehta të shoqërisë dhe showbiz-it.
Rikthimi i “Goca dhe Gra” me këtë kombinim të emrave të njohur dhe zërave të rinj e bën programin edhe më tërheqës për publikun. Mbetet për t’u parë se si do të funksionojë ky format i përzier, por një gjë është e sigurt: e premtja në mbrëmje s’do të jetë më e njëjta!
