Spektakli i shumëpritur “X Factor Albania 6” pritet të nisë nesër, por vetëm një ditë para nisjes ka ndodhur një lëvizje surprizë në formacionin e jurisë. Këngëtarja e njohur Elhaida Dani, e cila ishte konfirmuar si pjesë e panelit, ka njoftuar tërheqjen nga roli i saj si mentore e kategorisë së djemve.
Produksioni i spektaklit ka reaguar menjëherë duke konfirmuar se vendin e Elhaidës do ta zërë një tjetër figurë e njohur për publikun shqiptar: Soni Malaj.
Pas një pauze të gjatë, Soni Malaj rikthehet në jurinë e “X Factor Albania”. Publiku e kujton atë si mentore në sezonin e dytë dhe të tretë të spektaklit, ku ajo udhëhoqi me sukses kategorinë e djemve. Edhe këtë herë, Soni do të marrë përsipër të njëjtën detyrë, duke sjellë përvojën dhe energjinë e saj për të ndihmuar konkurrentët të arrijnë potencialin e tyre maksimal.
Produksioni nuk ka dhënë ende një shpjegim zyrtar për largimin e papritur të Elhaida Danit nga “X Factor Albania 6”. Edhe pse detajet mbeten të paqarta, ndryshimi i papritur ka ngritur pyetje mes fansave të spektaklit.
